Nafta Brent, fitimet më të mëdha javore – Sipas analistëve të tregut, në fokus janë shqetësimet për furnizimin

Çmimet e naftës ranë të premten, por qëndruan pranë nivelit më të lartë në dy muaj, me naftën bruto Brent të Londrës që po regjistron rritjen më të madhe javore në një muaj e gjysëm, mbështetur nga perspektiva e një ndalimi të BE-së për naftën ruse dhe sezoni i ardhshëm veror në SHBA .

Kontratat e së ardhmes së naftës së papërpunuar Brent për korrikun ranë 21 cent, në 117.19 dollarë për fuçi, ndërsa nafta e Teksasit Perëndimor ra 24 cent, në 113.85 dollarë për fuçi.

Analistët e tregut shprehen se shqetësimet për furnizimin janë padyshim në fokus pasi tregu në SHBA është shtrënguar ndjeshëm, ndërsa Bashkimi Europian ende po shqyrton ndalimin e eksporteve të naftës së papërpunuar ruse. Një zyrtar i lartë hungarez tha se vendit i duheshin deri në 4 vjet për t’u larguar nga nafta ruse dhe për të bërë investime të mëdha. Hungaria nuk mund të mbështeste embargon e naftës të propozuar nga BE derisa të kishte një marrëveshje për të gjitha çështjet, shtoi ai.

Nga ana tjetër, tregu i SHBA do të mbetet në fokus në afatin e afërt pasi jemi pranë fillimit të sezonit veror. Gjithashtu, në fokus do të jetë situata e COVID-19 në Kinë dhe nëse po merren më shumë masa për të mbështetur ekonominë.

Çmimet janë rritur me rreth 50% deri më tani këtë vit. OPEC + është vendosur t’i përmbahet marrëveshjes së prodhimit të naftës të vitit të kaluar në takimin e 2 qershorit dhe të rrisë objektivat e prodhimit të korrikut me 432,000 fuçi në ditë. Anëtarët e OPEC+ në këtë mënyrë do të kundërshtonin thirrjet perëndimore për një rritje më të shpejtë të prodhimit për të frenuar rritjen e çmimeve.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.