Nafta, e qëndrueshme në mbi 81 USD Investitorët, në pritje të takimit të OPEC+ të dielën

Nafta po qëndron në rënie në sesionin e sotëm, ndërsa pritet një sesion i qetë përpara Ditës së Falenderimeve në SHBA të enjten. Në anën tjetër, tregu po pret lajme në lidhje me uljen e prodhimit nga grupi i prodhuesve OPEC+.

Nafta Brent e Londrës po tregtohet lehtë mbi nivelin e 81 dollarëve për fuçi, ndërsa nafta Bruto amerikane po tregtohet në rreth 77 dollarë për fuçi. Të dyja kontratat kanë publikuar humbje për të katërtën javë me radhë, për shkak të shqetësimeve në rritje mbi perspektivën e kërkesës për naftë.

Investitorët po tregohen të kujdesshëm, në pritje të takimit të planifikuar të OPEC+ të dielën, kur grupi i prodhuesve mund të diskutojë thellimin e shkurtimeve të furnizimit për shkak të ngadalësimit të rritjes ekonomike globale.

Të hënën, të dyja kontratat u rritën me rreth 2% pasi tre burime të OPEC+ deklaruan për Reuters se grupi do të konsideronte më shumë shkurtime të furnizimit, në takimin e 26 nëntorit. Analistët parashikojnë se, OPEC+ ka të ngjarë të zgjasë apo edhe të thellojë shkurtimet e furnizimit me naftë, vitin e ardhshëm.

Por, edhe nëse ky skenar do të ndodhë, tregu global i naftës do të përballet me një suficit të lehtë të furnizimit në vitin 2024, parashikon Agjencia Ndërkombëtare e Energjisë (IEA). Referuar të dhënave të Institutit Amerikan të Naftës, rezervat e naftës bruto në SHBA u rritën me 9.1 milionë fuçi, gjatë javës që u mbyll më 17 nëntor.

Megjithatë, investitorët po presin të dhënat zyrtare që do të publikohen ditën e sotme nga Administrata për Informimin mbi Energjinë, ndërsa e enjtja do të jetë një feste publike në SHBA, me rastin e Ditës së Falenderimeve.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.