Nafta, e qëndrueshme pranë 75 USD – Zjarret në Alberta të Kanadasë mbështesin çmimet
Nafta po tregtohet e qëndrueshme edhe në sesionin e sotëm, pasi Shtetet e bashkuara po planifikojnë të mbushin rezerva strategjike. Ndërkohë, çmimet po gjejnë një mbështetje nga zjarret që kanë përfshirë disa fusha naftëmbajtëse në Kanada.
Nafta Brent e Londrës po tregtohet në mbi 75 dollarë për fuçi, ndërsa nafta Bruto amerikane po tregtohet në rreth 71 dollarë për fuçi. Në sesionin e kaluar, të dy bençmarkët u rritën me më shumë se 1%, duke i dhënë fund tre sesioneve me radhë në rënie.
Departamenti i Energjisë në SHBA deklaroi të hënën se do të blejë 3 milionë fuçi naftë, për porositë e gushtit. Megjithatë, çmimet vijojnë të gjenden nën presion nga të dhënat që sugjerojnë një ngadalësim të ekonomisë kineze, pavarësisht heqjes së masave kundër përhapjes së Covid-19.
Ndërkohë, zjarret që kanë përfshirë zonën e Albertas në Kanada kanë detyruar rreth 30 mijë punonjës të kthehen në shtëpitë e tyre, ndërsa tregut po i mungojnë rreth 320 mijë fuçi naftë në ditë, e barabartë me 3.7% të prodhimit total të Kanadasë.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.