Nafta, e qëndrueshme pranë 84 USD – Mbështetet nga shenjat për rimëkëmbjen e ekonomisë kineze

Nafta po tregtohet e qëndrueshme në sesionin e sotëm, ndërsa gjatë tregtisë aziatike ka gjetur një mbështetje nga të dhënat pozitive mbi ekonominë kineze, që është importuesja më e madhe e naftës në botë. Në anën tjetër, fitimet janë kufizuar nga rritja e rezervave të naftës në SHBA.

Nafta Brent e Londrës po tregtohet në rreth 84 dollarë për fuçi, ndërsa nafta Bruto amerikane po tregtohet në rreth 77 dollarë për fuçi. Të dyja kontratat u rritën me rreth 1% në sesionin e kaluar, pasi të dhënat e publikuara në Kinë treguan se aktiviteti i sektorit të manifakturës në Kinë u zgjerua me hapin më të shpejtë në mbi një dekadë.

Ndërkohë, referuar të dhënave në SHBA, rezervat e naftës u rritën me 1.2 milionë fuçi, gjatë javës që u mbyll më 24 shkurt, në totalin e 480.2 milionë fuçive, niveli më i lartë që nga maji i vitit 2021.

Analistët e anketuar nga Reuters parashikonin një rritje me 500 mijë fuçi. Njëkohësisht, përpunimi i naftës nga rafineritë në Indi preku një nivel rekord gjatë janarit, pasi vendi ka rritur importet nga Rusia, pas vendosjes së sanksioneve nga vendet perëndimore.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.