Nafta, e qëndrueshme pranë 88 USD – Largohet përkohësisht frika për çrregullim të furnizimit të tregut

Nafta po tregtohet e qëndrueshme në sesionin e sotëm, pasi u rrit me mbi 4% në sesionin e kaluar, me investitorët që po monitorojnë nga afër zhvillimet në lidhje me çrregullimin e furnizimit të tregut, si pasojë e konfliktit mes Izraelit dhe Hamasit.

Nafta Brent e Londrës po tregtohet në rreth 88 dollarë për fuçi, ndërsa nafta Bruto amerikane po tregtohet në rreth 86 dollarë për fuçi. Në sesionin e së hënës, të dyja kontratat u rritën me mbi 3.5 dollarë, për shkak të sulmeve të Hamasit në Izrael. Investitorët frikësohen se ky konflikt mund të përhapet edhe në rajonin e pasur me naftë.

Ndërsa Izraeli prodhon shumë pak naftë bruto, tregjet shqetësoheshin se nëse konflikti përshkallëzohet, mund të dëmtojë furnizimin në Lindjen e Mesme dhe të përkeqësojë një deficit të pritshëm për pjesën tjetër të vitit.

Porti Ashkelton në Izrael dhe terminalet e tij u mbyllën menjëherë pas shpërthimit të konfliktit. Një zëdhënës i Shtëpisë së Bardhë deklaroi të hënën se, Irani është bashkëpunëtor edhe pse Shtetet e Bashkuara nuk kanë prova që tregojnë pjesëmarrjen e drejtpërdrejtë të Iranit në sulme. Ndërkohë, analistët mendojnë se nafta do të tregtohet mes 90 dhe 100 dollarë për fuçi në tremujorin e fundit të këtij viti.

Lidion Kulla / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.