Nafta, humbje javore prej rreth 1% – Ndikon ngadalësimi i kërkesës në Kinë dhe në SHBA

Nafta po qëndron në rënie edhe në sesionin e sotëm dhe pritet të publikojë humbje për të dytën javë me radhë, në mbyllje të ditës së sotme. Investitorët janë të shqetësuar për ngadalësimin e kërkesës, por në anën tjetër ka shpresa se Shtetet e Bashkuara dhe Irani mund të arrijnë një marrëveshje për programin bërthamor. Nafta Brent e Londrës po tregtohet në rreth 75.5 dollarë për fuçi, ndërsa nafta Bruto amerikane po tregtohet në rreth 71 dollarë për fuçi.

Analistët parashikojnë se çmimet e naftës do të qëndrojnë pranë 70 dollarëve, me një marzh luhatjeje prej 3 dollarësh. Të dyja kontratat ranë me rreth 1 dollar në sesionin e së enjtes, ndërsa gjatë kësaj jave kanë rënë me rreth 1%. Në fillim të javës, çmimet u rritën ndjeshëm për shkak të lajmeve se Arabia Saudite do të ulë në mënyrë vullnetare prodhimin, edhe me 1 milionë fuçi naftë në ditë.

Por, në vijim shenjat për ngadalësimin e ekonomisë kineze dhe asaj amerikane ushtruan presion mbi çmimet. Në fokus të tregjeve është edhe takimi i Rezervës Federale javën e ardhshme dhe shumica e analistëve parashikojnë se politika monetare nuk do të ndryshojë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.