Nafta i rikthehet fitimeve – Por, pritet të realizojë humbje javore prej mbi 8%

Nafta po qëndron në rritje në sesionin e sotëm, por pritet të publikojë humbje për të tretën javë me radhë, për shkak të shqetësimeve për ngadalësimin e kërkesës në Kinë dhe Shtetet e Bashkuara të Amerikës. Nafta Brent e Londrës po tregtohet në rreth 73 dollarë për fuçi, ndërsa nafta Bruto amerikane po tregtohet në rreth 69 dollarë për fuçi. Gjatë kësaj jave, ndërkohë, nafta Brent ka rënë me mbi 8%, ndërsa nafta Bruto ka humbur mbi 10% të vlerës.

Shqetësimet për kontaminimin e sistemit bankar në Shtetet e Bashkuara dhe një kontraktim surprizë të sektorit të manifakturës në Kinë kanë qënë arsyet kryesore që kanë rrëzuar çmimet, gjatë kësaj jave. Në anën tjetër, pritshmëritë për një ulje të mundshme të prodhimit nga OPEC+ në takimin e qershorit kanë ofruar një mbështetje për çmimet në sesionin e sotëm.

Tregtarët po presin edhe të dhënat mbi punësimin në SHBA për muajin prill, që do të publikohen më vonë gjatë ditës së sotme dhe do të japin një panoramë më të qartë mbi shëndetin e ekonomisë më të madhe në botë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.