Nafta, në rritje të lehtë pas dy ditësh në rënie – Qëndron në nivelin më të ulët për këtë vit. Radhë anijesh në portet e Turqisë

Nafta i është rikthyer fitimeve gjatë tregtisë së sotme europiane, pas humbjeve të konsiderueshme në dy sesionet e fundit, ku preku edhe nivelin më të ulët për këtë vit. Çmimet u gjendën nën presion nga rritja e rezervave të naftës bruto dhe benzinës në SHBA, por edhe nga shenjat për ngadalësimin e ekonomisë më të madhe në botë. Nafta Brent e Londrës po tregtohet në rreth 78 dollarë për fuçi, ndërsa nafta Bruto amerikane po tregtohet në rreth 72 dollarë për fuçi.

Të dy bençmarkët prekën nivelin më të ulët për këtë vit, gjatë sesionit të kaluar. Referuar të dhënave në SHBA, prodhimi i naftës bruto u rrit në 12.2 milionë fuçi gjatë javës së kaluar, niveli më i lartë që nga gushti i këtij viti. Njëkohësisht, edhe rezervat e benzinës u rritën me 5.3 milionë fuçi, në totalin e 219.1 milionë fuçive, një shenjë që tregon se amerikanët po lëvizin më pak me mjetet e tyre.

Sipas analistëve, mbështetja e vetme për çmimet e naftës është vendimi i autoriteteve në Kinë për të lehtësuar masat kundër Covid-19. Ndërkohë, zyrtarët perëndimorë janë në bisedime me Turqinë për të zgjidhur radhët e anijeve çisternë, pasi G7-a dhe Bashkimi Europian vendosën kufizime të reja më 5 dhjetor, që synojnë eksportet ruse të naftës. Të paktën 20 tankera vazhdojnë të përballen me vonesa për të kaluar nga portet ruse në Detin e Zi drejt Mesdheut, ndërsa operatorët po përpiqen të respektojë rregullat e Turqisë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.