Nafta në Shqipëri, më e larta në rajon – Rama: Bord komunist, por kemi taksa të ulëta. Tabaku: Të “shkrihet”

Bord komunist por ndihmesë psikologjike dhe financiare në kohë krize, kështu e ka cilësuar kryeministri Rama Bordin e Transparencës pas rritjes rekord të çmimit të naftës. Debateve të ngritura në séancën plenare këtë të enjte nga opozita  për çmimet e karburanteve Rama iu është përgjigjur duke thënë se vendi ynë ka taksat më të ulëta.

Rama u shpreh se ‘Ndryshe nga të tjerët në rajon kemi taksat më të ulëta sepse ndryshe nga rajoni, ne biznesit të vogël nuk i marrim asnjë lekë, zero taksë me zero tvsh deri në 100 milionë xhiro. Ndryshe nga rajoni, ne vërtetë e kemi më të lartë se të tjerët taksën mbi biznesin e madh por ne subvencionojmë 100% energjinë elektrike jo për të gjitha familjet, por edhe për biznesin e vogël. prandaj nëse i mendojmë të gjitha këto, del e qartë pse te tabela e karburantit, ata që kanë më shumë mundësi do paguajnë më shumë sepse barrën e krizës do ta shpërndajmë që t’i japim mundësi atyre që prodhojnë ta ndjejnë më pak, atyre që eksportojnë, që lëvizin për punë me autobus e me radhë’.

Nga foltorja e Kuvendit deputetja JoridaTabaku i kërkoi qeverisë  të mos ekzistojnë më bordet për rregullimin e çmimeve.

‘Bordet duhet të zëvendësohen me paketa për mbështetje për qytetarët. Çfarë po ndodh me bordet e Transparencës. Autoriteti i Konkurrencës ka dy vite që bën hetim pa asnjë masë pa asgjë. Çfarë masash ka marrë qeveria. Ku jemi sot? Çfarë po ndodh sot me tregun e karburantëve në Shqipëri që ndryshe nga Rajoni sot ka çmimet më të larta. Bordi i transparencës nuk duhet të funksiononte, pasi tregu i ka çmimet më të lira se ai që përcakton bordi,’ tha Tabaku.

Nafta ka arritur çmimin rekord prej 258 lekë që prej datës 8 qershor.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.