Nafta ngjitet drejt 80 USD – Angola largohet nga OPEC, zbeh efektin e sulmeve në Detin e Kuq

Nafta i është rikthyer fitimeve në sesionin e sotëm, ndërsa vazhdojnë tensionet në Lindjen e Mesme pas sulmeve të grupit Houthi ndaj anijeve të transportit në Detin e Kuq. Në anën tjetër, fitimet janë kufizuar nga vendimi i Angolës për t’u larguar nga OPEC, pasi ka ngritur pikëpyetje mbi efektivitetin e grupit në mbështetjen e çmimeve.

Nafta Brent e Londrës po tregtohet pranë 80 dollarëve për fuçi, ndërsa nafta Bruto amerikane po tregtohet pranë 74 dollarëve për fuçi. Gjithmonë e më shumë transportues detarë po shmangin Detin e Kuq, për shkak të sulmeve ndaj anijeve nga grupi militant Houthi që operon në Jemen, në mbështetje të palestinezëve.

Këto sulme kanë shkaktuar një ndërprerje të tregtisë globale përmes Kanalit të Suezit, i cili trajton rreth 12% të tregtisë në mbarë botën. Kompania gjermane, Hapag-Lloyd dhe ajo e Hong Kongut OOCL ishin të fundit që thanë se do të shmangnin Detin e Kuq.

Shtetet e Bashkuara të Amerikës nisën të martën një operacion shumëkombësh për të mbrojtur tregtinë në Detin e Kuq, por grupi Houthi tha se do të vazhdojë të kryejë sulme. Megjithatë, analistët shprehen se ndikimi në furnizimin e tregut me naftë, deri më tani ka qenë i kufizuar, pasi pjesa më e madhe e naftës të Lindjes së Mesme eksportohet nëpërmjet Ngushticës së Hormuzit.

Ministri i naftës në Angolës, njoftoi të enjten se anëtarësimi në Organizatën e Vendeve Eksportuese të Naftës (OPEC) nuk po i shërbente interesave të vendit. Angola kishte protestuar më parë ndaj vendimit të OPEC+ për të reduktuar kuotat e prodhimit të naftës për vitin 2024. Grupi i prodhuesve, të udhëhequr nga Arabia Saudite, në muajt e fundit ka marrë mbështetje për të thelluar shkurtimet e prodhimit dhe për të rritur çmimet e naftës.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.