Nafta ngjitet në rreth 81 USD – OPEC+ mund t’a zgjerojë uljen e prodhimit edhe në 2024

Nafta po qëndron në rritje edhe në sesionin e parë të kësaj jave, duke zgjeruar fitimet e së premtes së kaluar, për shkak të pritshmërive se OPEC+ do të vijojë më marrëveshjen për uljen e prodhimit. Megjithatë, çmimet publikuan humbje për të katërtën javë me radhë, për shkak të largimit të shqetësimeve mbi çrregullimin e furnizimit nga Lindja e Mesme si pasojë e konfliktit Izrael-Hamas. Edhe shenjat për ngadalësimin e kërkesës në SHBA dhe në Kinë kanë ushtruar presion mbi çmimet.

Nafta Brent e Londrës po tregtohet në rreth 81 dollarë për fuçi, ndërsa nafta bruto amerikane po tregtohet në mbi 76 dollarë për fuçi. Të dyja kontratat u rritën me rreth 4% të premten, pasi tre burime brenda OPEC+ deklaruan për Reuters se vendet prodhuese do të diskutojnë në takimin e 26 nëntorit edhe mundësinë e shkurtimit të mëtejshëm të kuotave të prodhimit. Që nga fundi i shtatorit, çmimet e naftës kanë rënë me rreth 20%. Ndërkohë, edhe banka amerikane Goldman Sachs nuk e përjashton mundësinë e reduktimit të prodhimit nga karteli dhe aleatët e tjerë.

“Modeli ynë statistikor i vendimeve të OPEC sugjeron që shkurtimet më të thella nuk duhet të përjashtohen duke pasur parasysh rënien e pozicionimit spekulativ dhe të diferencave kohore dhe rezervave më të larta se sa pritej”, thanë në një shënim analistët e Goldman Sachs.

Parashikimi bazë i bankës është që shkurtimet ekzistuese të prodhimit të OPEC+ të qëndrojnë në fuqi edhe në vitin 2024, ndërsa ulja vullnetare e prodhimit me 1 milion fuçi në ditë nga Arabia Saudite, do të zgjatet deri në tremujorin e dytë të vitit të ardhshëm. Investitorët janë të fokusuar edhe te ndërprerjet në tregtimin e naftës nga Rusia, pasi Uashingtoni vendosi sanksione ndaj tre anijeve që kanë dërguar naftën e papërpunuar ruse në Indi.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.