Dollari, në nivelin më të ulët në mbi 2 muaj – Investitorët vendosin baste kundër rritjes së interesave në SHBA

Dollari amerikan po qëndron në rënie në sesionin e parë të kësaj jave, dhe po tregtohet në nivelin më të ulët në 2 muaj e gjysëm, duke zgjeruar humbjet e javës së kaluar, pasi investitorët po vendosin baste se Rezerva Federale do ta mbyllë ciklin e rritjes së interesave.

Indeksi që mat ecurinë e dollarit amerikan, përballë shportës me 6 monedhat kryesore ndërkombëtare po qëndron në rreth 103.6, niveli më i ulët që nga 1 shtatori, duke zgjeruar humbjet prej 2% të javës së kaluar. Në anën tjetër, euro është ngjitur mbi 1.09 dollarë, ndërsa jeni është forcuar deri në 148 në raport me monedhën e gjelbër.

Tregjet e kanë ulur rrezikun e rritjes së mëtejshme të normës nga Rezerva Federale, pasi treguesit ekonomikë në SHBA rezultuan më të dobët se sa pritej, veçanërisht pas një leximi të inflacionit që rezultoi nën vlerësimet e tregjeve. Tashmë fokusi do të përqendrohet te koha se kur do të vijë ulja e parë e normave të interesit. Investitorët po vlerësojnë 30% mundësi që FED mund të fillojë lehtësimin e politikës monetare në muajin mars të vitit të ardhshëm.

Ndërkohë, procesverbali i takimit të fundit të bankës qendrore amerikane mund të japë një panoramë më të qartë mbi opinionet e politikëbërësve në lidhje me normat e interesit. Edhe paundi britanik po qëndron pranë nivelit më të lartë në 2 muajt e fundin përballë dollarit amerikan.

Ndër zhvillimet e tjera, Kina i la të pandryshuara normat e saj të kreditimit, më përputhje me parashikimet e analistëve, pasi një juan më i dobët vazhdoi të kufizonte lehtësimin e mëtejshëm monetar.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.