Ari, i qëndrueshëm në rreth 1980 dollarë – Ngadalësimi i inflacionit në SHBA mbështet metalin e verdhë

Ari është kthyer në rënie të lehtë gjatë tregtisë aziatike, ndërsa humbjet po kufizohen nga dobësimi i dollarit amerikan, përballë monedhave kryesore ndërkombëtare. Gjithmonë e më shumë, investitorët po vendosin baste se Rezerva Federale mund t’i ketë dhënë fund rritjes së interesave.

Kontrata “spot” e arit po tregtohet në rreth 1980 dollarë për onz, ndërsa javën e kaluar u rrit me 2.2%. “Ne kemi parë një ndryshim mjaft domethënës gjatë javës së fundit në tregje, lidhur me politikën e Rezervës Federale dhe mbi kohën se kur do të ulë normat e interesit,” tha Kyle Rodda, analiste e tregut financiar pranë Capital.com.

Të dhënat që tregojnë për një ngadalësim të tregut të punës në SHBA dhe një raport më të dobët se sa pritej për inflacionin javën e kaluar, ringjallën shpresat se banka qendrore amerikane mund të fillojë të lehtësojë kushtet monetare më shpejt se sa pritej.

Normat më të ulëta të interesit ushtrojnë më pak presion mbi yield-et e obligacioneve dhe mbi dollarin amerikan. Indeksi që mat ecurinë e dollarit amerikan, përballë shportës me 6 monedhat kryesore ndërkombëtare po qëndron në rënie me rreth 0.2% dhe po tregtohet në nivelin më të ulët në 2 muaj e gjysmë, duke e bërë arin më të lirë për zotëruesit e monedhave të tjera.

Zotërimet në SPDR Gold Trust, që është fondi më i madh në botë i tregtuar në shkëmbim dhe që mbështetet te metali i çmuar, u rritën me 1.49% në 883.43 ton të premten. Ndër metalet e tjera, ari po tregtohet në rreth 23.7 dollarë për onz, ndërsa platini po tregtohet në mbi 900 dollarë për onz.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.