Bitcoin ngjitet sërish në mbi 37,000 USD – Mbështetet nga fitorja e Milei në zgjedhjet presidenciale në Argjentinë

Bitcoin është ngjitur në mbi 37,000 dollarë në sesionin e sotëm, pasi zgjedhjet presidenciale në Argjentinë u fituan nga Javier Milei, një kandidat pro kriptomonedhave. Për rrjedhojë i gjithë tregu u rrit me mbi 2% në 24 orët e fundit.

Milei, që e ka përshkruar veten si një një anarko-kapitalist, ka qenë mbështetës i bitcoin, duke e quajtur si “kthimin e parave te sektori privat”. “Duhet të kuptojmë se banka qendrore është një mashtrim”, tha Milei në fillim të këtij viti kur u pyet për bitcoin.

“Ajo që përfaqëson bitcoin,” vazhdoi ai, “është kthimi i parave te krijuesi i tij origjinal, sektori privat”. Megjithatë, Milei nuk ka shkuar aq larg sa të propozojë një kurs ligjor për bitcoin. Në vend të kësaj, ai po bën thirrje për të eliminuar bankën qendrore të vendit dhe për të dollarizuar ekonominë argjentinase, e cila është bllokuar nga inflacioni që arriti në 142% në tetor.

Gjithashtu, në fokus të tregjeve kanë qenë edhe kriptomonedhat e lidhura me Inteligjencën Artificiale, të cilat kanë fituar rreth 8% të vlerës. Kjo javë pritet të jetë shumë e ngjeshur me lajme rreth kriptomonedhave, me disa ngjarje dhe njoftime që mund të nxisin lëvizjet e tregut.

Të martën, do të publikohet procesverbali i takimit të fundit të Rezervës Federale, që do të japë një panoramë më të qartë në lidhje me normat e interesit. Gjithashtu të martën, Nvidia do të raportojë fitimet e saj për tremujorin e tretë të vitit.

Kjo kompani po bëhet ndër lojtarët kryesorë në revolucionin e Inteligjencës Artificiale. Në lidhje me përgjysmimin e normës së gjenerimit të bitcoin, që do të ndodhë në prill të vitit 2024, investitorët mendojnë se kriptomonedha më e madhe në botë mund të bjerë drejt 30 mijë dollarëve, përpara se të vijojë një “marshim i ri” në mbi 40 mijë dollarë. Megjithatë, analistët vlerësojnë se, gjatë gjysmës së parë të vitit të ardhshëm ecuria e tregut të kriptomonedhave do të ndikohet edhe nga ecuria e tregut të aksioneve dhe të borxhit.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.