Nafta zbret pranë 74 USD për fuçi – Ndikohet nga ngadalësimi i kërkesës dhe rritja e prodhimit
Nafta po qëndron në rënie në sesionin e parë të kësaj jave, pasi investitorët kanë ende paqartësi në lidhje me vendimet që do të marrin bankat qendrore në vonë gjatë kësaj jave. Gjithashtu, ngadalësimi i ekonomisë kineze dhe rritja e furnizimit të tregut nga Rusia kanë ushtruar presion mbi çmimet. Nafta Brent e Londrës po tregtohet në rreth 74 dollarë për fuçi, ndërsa nafta Bruto amerikane po tregtohet në mbi 69 dollarë për fuçi.
Të dyja kontratat realizuan humbje javore për të dytën jave me radhë, pasi të dhënat zhgënjyese mbi ekonominë kineze kanë rikthyer shqetësimet për ngadalësimin e kërkesës në ekonominë e dytë më të madhe në botë. Këto zhvillime kanë eklipsuar angazhimin e Arabisë Saudite për të ulur prodhimin edhe me 1 milionë fuçi naftë në ditë, duke filluar nga korriku.
Ndërkohë, shumica e analistëve parashikojnë se Rezerva Federale në SHBA nuk do të ndryshojë politikën monetare në takimin që përfundon të mërkurën. Referuar të dhënave të tjera, eksportet e Rusisë drejt Indisë janë rritur ndjeshëm, pavarësisht embargos së vendosur nga Bashkimi Europian dhe vendet e G7-ës në dhjetorin e kaluar.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.