Nafta zgjeron humbjet, tregtohet pranë 95 dollarë – Ndikon forcimi i Dollarit dhe rritja e infektimeve me Covid-19 në Kinë

Nafta po qëndron në rënie edhe në sesionin e sotëm, duke zgjeruar humbjet prej rreth 2% një ditë më parë, për shkak të forcimit të dollarit amerikan dhe rasteve të reja me Covid-19 në Kinë, që mund të ngadalësojnë kërkesën për naftë.

Nafta Brent e Londrës po tregtohet në rreth 95 dollarë për fuçi, ndërsa nafta Bruto amerikane po tregtohet në rreth 90 dollarë për fuçi.

Një dollar më i fortë i bën lëndët e para që janë të denominuara në monedhën e gjelbër, më të shtrenjta për zotëruesit e monedhave të tjera.

Ndërkohë, në Kinë rastet e reja me Covid-19 kanë prekur nivelin më të lartë që nga gushti i këtij viti dhe kanë detyruar autoritetet të vendosin kufizime të reja. Megjithatë, humbjet po kufizohen nga vendimi i OPEC+ për të ulur prodhimin me rreth 2 milionë fuçi naftë në ditë, për shkak të shenjave të ngadalësimit të ekonomisë.

Vendimi vjen në një kohë që Bashkimi Europian do të zbatojë sanksionet e reja ndaj naftës ruse, duke filluar nga dhjetori i këtij viti.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.