Ndërtimet pa leje, Prokuroria shumë më pak aktive se Qeveria – Organi i akuzës në 2022 uli me 35% numrin e procedimeve për objektet e paligjshme

Ndërsa viti 2022 shënoi një aksion masiv të Qeverisë kundër ndërtimeve të paligjshme, kryesisht lidhur me objekte shumë të rëndësishme në qendër të Tiranës apo në bregdet, e kundërta ka ndodhur me prokurorinë. Ajo ka ulur ndjeshëm numrin e procedimeve për ndërtimet e paligjshme në vitin 2022. Sipas të dhënave zyrtare, numri i procedimeve për veprën penale Ndërtimi i paligjshëm të parashikuar nga Neni 199/a ka rënë me 35% krahasuar me vitin e shkuar. Nga procedime 1757 të nisura në vitin 2021, për vitin e shkuar prokuroritë në gjithë vendin kanë ulur në 1125 numrin e tyre. Rënia rezulton më e lehtë sa i takon numrit të dosjeve të dërguar në gjykatë dhe të personave të dënuar për këtë vepër penale.

Numri më i lartë i procedimeve për vepra penale kundër regjimit juridik të tokës, është regjistruar në prokurorinë e shkallës së parë Tiranë, 18 %, ndërkohë që koeficienti më i lartë për 100,000 mijë banorë rezulton në qarkun Kukës me 126 procedime dhe qarkun Vlorë me 106 procedime.

Nga numri i të pandehurve të rritur, rezultojnë se 7,4 % e përbëjnë femrat dhe 92,6 % meshkujt. Në lidhje me arsimin e të pandehurve rezulton se 38,1 % janë me arsim të mesëm, 3,4 % të pandehur me arsim të lartë dhe pjesa tjetër prej 58,5 % me arsim 9 vjeçar.

Në sektorin privat rezultojnë të punësuar 45,7 % e të pandehurve, në sektorin shtetëror 0,4 % dhe pjesa tjetër e të pandehurve prej 53,9 % janë të papunë.

Nga treguesit vërehet se 33 % e të pandehurve kanë vendbanimin në qytet, ndërsa 67 % prej tyre në fshat. Në lidhje me gjendjen gjyqësore të të pandehurve, theksojmë se pjesa më e madhe e tyre, 96,2 % janë të padënuar më parë, 0,5 % e të pandehurve përsëritës për të njëjtën vepër dhe 3,3 % përsëritës për vepra të ndryshme penale.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.