Ndërtuesit shpjegojnë pse po rrisin çmimet e banesave – Letër qeverisë/ Ndërhyni në çmimet e referencës dhe taksën e pronës

Ndërsa çmimet e apartamenteve në Tiranë, por jo vetëm, po rriten me shpejtësi duke u bërë të papërballueshme nga qytetarët, ndërtuesit kanë listuar një sërë arsyesh se përse po ndodh ky fenomen, duke hedhur fajin mbi qeverinë dhe politikat e ndërmarra ndër vite.

Përmes një letre zyrtare dërguar ekzekutivit, Shoqata e Ndërtuesve ngre shqetësimin se qe nga viti 2018 dhe në vijim janë ndërmarrë një sërë nismash ligjore që kanë rritur ndjeshëm kostot e ndërtimit dhe rrjedhimisht edhe çmimet në treg.

Nisma e fundit të cilët ndërtuesit e shohin me shqetësim është ndryshimi i çmimeve të referencës së vlerës së taksueshme të pasurive të paluajtshme ndërtesa, vendim i cili u miratuar në korrik të këtij viti. Sipas shoqatës, ndryshimi do të japë impakt të menjëhershëm mbi individët që do të kryejnë transaksione të pasurive të paluajtshme, duke përfshirë edhe ata që kanë kryer rishtazi rivlerësimin.

Nga ana tjetër, theksohet se impakti do të jetë i menjëhershëm mbi aktivitetin e ndërtimit duke qenë se çmimet shërbejnë si faktor për përcaktimin e vlerës së taksës në infrastrukturë dhe në vlera monetare zëvendësuese të taksës 3 % të kontributit të strehimit social si dhe pasoja mbi tatim-fitimin.

Po ashtu taksa mbi pasuritë e paluajtshme dhe mënyra se si është konceptuar projektligji i ri, ky synohet të taksohet trualli apo toka bujqësore gjatë periudhë së ndërtimit, do të jetë sërish një shtesë kostosh që do të reflektohet në çmim.  Ndërtuesit kërkojnë nga qeveria që të ndërhyjë në disa aspekte në mënyrë që ky trend i rritjes së çmimeve të ndalet. Konkretisht kërkohet, që të paktën hyrja në fuqi e çmimeve të reja të referencës të jetë graduale ose aplikimi të lidhet me projekte që nisin pas hyrjes në fuqi të vendimit.

Ndërtuesit sugjerojnë që taksa e ndikimit në infrastrukturë, të rishikohet në aspektin e shkallës tatimore, ku sidomos në Tiranë të variojë në rangun 2-6 % dhe mënyra e llogaritjes të jetë e orientuar drejt kostos së ndërtimit dhe jo sipas çmimeve të referencës.

Po ashtu, kërkohet shfuqizimi i ligjit për kontributin social, si i papajtueshëm me Kushtetutën; përjashtim nga pagesa për trajtimin e dherave të zakonshme si dhe kompensim i variacionit të çmimeve, në mënyrë që zhvilluesit të jenë të mbrojtur ndaj luhatjeve të kostove të materialeve të ndërtimit.

 

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.