Ndryshon pas 23 vitesh ligji për sekretin shtetëror – Përfshihen sistemet e komunikimit dhe siguria industriale

Këshilli i Ministrave ka dërguar për miratim në Kuvend një projeltloigj për ri për “Informacionoin e Klasifikuar”. Nisma ligjore është hartuar nga Drejtoria e Sigurimit të Informacionit të Klasifikuar  dhe ka për qëllim mbrojtjen e informacionit nga humbja, dëmtimi, rrjedhja, komprometimi dhe/ose ekspozimi i paautorizuar.

Përmes këtij ligji të ri, synohet të shfuqizohet ligji ekzistues, i miratuar që në vitin 1999.

Në këtë projektligj përcaktohen parimet bazë dhe rregullat e përgjithshme për  krijimin, administrimin dhe mbikëqyrjen e informacionit të klasifikuar “Sekret  shtetëror”, të NATO-s, të Bashkimit Evropian, të shteteve dhe  organizatave të tjera ndërkombëtare.

Risitë e këtij projektligji janë rregullimi i disiplinave për mbrojtjen e informacionit të klasifikuar si: “Siguria e sistemeve të komunikimit dhe informacionit” dhe “Siguria industriale”, të  cilat nuk kanë qenë të rregulluara në ligjin aktual;

Po ashtu, përcaktohet në ligj se cilat janë autoritetet përgjegjëse për mbrojtjen e informacionit të  klasifikuar në sistemet e komunikimit dhe informacionit.

Ligji përcakton gjithashtu përjashtimin e procedurave të verifikimit të sigurisë për Presidentin e Republikës së Shqipërisë dhe Kryeministrin, të cilët autorizohen të kenë qasje tek informacioni i klasifikuar, për shkak të kryerjes së detyrave të tyre zyrtare.

Për herë të parë është përkufizuar koncepti i pronësisë së huaj, si formë kontrolli apo influencë kërcënuese për sigurinë e informacionit të klasifikuar për llogari  dhe në interes të vendeve apo palëve jomike.

Në projektligj nuk parashikohet krijimi i ndonjë strukture të re dhe as i ndonjë institucioni të ri, gjë që do të shoqërohej me efekte financiare për buxhetin e  shtetit.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.