Në 2023 u shitën më shumë automjete elektrike – Ritmi po ngadalësohet pasi synohen modele më të mira, më të vogla e më të lira

Shitjet globale të automjeteve plotësisht elektrike dhe hibride u rritën me 31% në 2023-shin, nga 60% rritje në vitin 2022, sipas firmës së kërkimit të tregut ‘Rho Motion’. Ritmi po ngadalësohet, por kjo është ajo që pritet në tregjet në rritje si ky dhe nuk mund të pritet çdo vit një dyfishim i shitjeve.

Shitjet globale të automjeteve elektrike vitin e kaluar ishin kryesisht në përputhje me rritjen prej 30% që kishte parashikuar ‘Rho Motion’. Për vitin 2024, firma parashikon rritje globale të shitjeve të automjeteve elektrike midis 25% dhe 30%. Shitjet në dhjetor arritën një rekord mujor prej 1.5 milionë njësi.

Automjetet elektrike, plotësisht elektrike, ose me bateri përbënin 9.5 milionë njësi nga 13.6 milionë të shitura në mbarë botën në vitin 2023, me ato hibride që përbëjnë pjesën tjetër.

Pas vitesh rritjeje të përshpejtuar, disa prodhues të automjeteve kanë frikë se shitjet e automjeteve elektrike në Europë dhe gjetkë mund të jenë drejt ngadalësimit të kërkesës, pasi drejtuesit presin për modele më të mira, më të vogla dhe më të lira. Shitjet u rritën 50% në SHBA dhe Kanada, ndërsa përkatësisht 27% dhe 15% në Europë dhe Kinë.

Shitjet në Europë në 2024-ën mund të preken nga vendimi i papritur i Gjermanisë vitin e kaluar për të hequr subvencione për prodhimin dhe blerjen e automjeteve elektrike.

‘Rho Motion’ thekson se vetëm 8% e shitjeve të automjeteve elektrike në Europë ishin në segmentin e automjeteve më të vogla, megjithëse kjo duhet të fillojë të ndryshojë me ardhjen e modeleve më të vogla si Citroen e C3 nga Stellantis që do të dalë në shitje këtë vit.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.