Netflix pranon largimin në masë të abonentëve – Nga muaji prill deri në qershon platforma numëron 1 milion abonentë më pak

Netflix ka paralajmëruar për skenarin më të keq të mundshëm për sa i përket largimit të abonentëve nga platforma: nga prilli në muajin qershor numërohen 1 milion të abonuar më pak. Por Netflix parashikon se numri i abonentëve do të rritet në tremujorin e katërt.

Investitorët e shohin parashikimin si një sinjal se Netflix mund të gjejë ende abonentë të rinj pavarësisht situatës së vështirë të ekonomisë globale dhe shenjat e ‘ngopjes’ në dy tregjet e tij më të mëdha, Shtetet e Bashkuara të Amerikës dhe Kanada.

Shërbimi më i madh i transmetimit në botë tha se planifikon të lançojë opsionin e tij të mbështetur nga reklamat vitin e ardhshëm. Ai gjithashtu paralajmëroi se dollari i fortë po godiste të ardhurat e rezervuara nga abonentët jashtë vendit.

Kompania kishte thënë në prill se priste të humbiste 2 milionë klientë në tremujorin e dytë, duke tronditur Uall Street dhe duke ngritur shqetësimet se bumi i transmetimit televiziv kishte marrë fund në mënyrë të papritur.

Netflix parashikoi që rritja e numrit të klientëve nga korriku deri në shtator të arrijë në 1 milion, ndërsa analistët e Uall Street-it prisnin mesatarisht një parashikim prej 1.84 milion, sipas analistëve të anketuar nga Refinitiv.

Aksionet e kompanive të tjera të transmetimit u rritën pak pas raportit të Netflix. Aksionet e Roku fituan 2.7% ndërsa Ualt Disney dhe Paramount Global u rritën secila rreth 1%.

Pas vitesh epërsi në këtë sektor, vlera dhe të ardhurat e Netflix ndryshuan pasi rivalët duke përfshirë Disney, Uarner Bros Discovery dhe Apple investuan shumë në shërbimet e tyre të transmetimit.

Netflix humbi 1.3 milionë klientë në Shtetet e Bashkuara të Amerikës dhe Kanada në tremujorin e dytë dhe 770 mijë në Europë, Lindjen e Mesme dhe Afrikë. Kjo u kompensua nga një fitim prej afro 1.1 milion abonentësh të rinj në rajonin e Azisë/Paqësorit.

Një mënyrë që kompania planifikon të fitojë më shumë nga anëtarët është duke kufizuar ndarjen mes më shumë se 2 personave të fjalëkalimeve. Kompania po teston dy opsione të tilla në Amerikën Latine.

Netflix mbetet shërbimi dominues i transmetimit me afro 221 milionë abonentë globalë me pagesë. Javën e kaluar, Netflix prezantoi Microsoft si partnerin e tij të teknologjisë dhe shitjeve për ofertën e mbështetur nga reklamat.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.