Ngadalësohet rritja e pagave në Eurozonë – Parashikimet flasin për 3.3% në 2026 nga 5.3% në 2023

Të dhënat për rritjen e pagave në Eurozonë janë inkurajuese, duke larguar frikën se pagat më të larta do të çojnë në shtrëngim të mëtejshëm të presioneve inflacioniste. Sipas indeksit të Bankës Qendrore Europiane, pagat e negociuara në Eurozonë u rritën me 4.5% në fund të 2023-shit. Ndërsa ky ritëm i tremujorit të katërt mbetet i lartë, është një ngadalësim në krahasim me ritmin e një rekordi prej 4.7% të regjistruar në tremujorin e mëparshëm.

Indeksi, i cili tregon presionet e mundshme të pagave duke analizuar të dhënat e paharmonizuara sipas vendeve, pritej më me padurim se zakonisht pasi zyrtarët në Frankfurt fokusohen në kostot e punës si një faktor kyç për të vendosur se kur të ulin normat e interesit.

Megjithatë, shumë duan të shohin të dhënat e tremujorit të parë të vitit 2024 – që pritet në maj – përpara se të miratojnë lehtësimin e politikës monetare. Presidentja e BQE-së Christine Lagarde i cilësoi ‘një nxitës gjithnjë e më të rëndësishëm të dinamikës së inflacionit në tremujorët e ardhshëm’, ndërsa paralajmëroi për rrezikun e vendimeve të nxituara për lehtësimin monetar nëse nuk ka siguri se rritja e çmimeve po shkon drejt objektivit prej 2%.

Në dhjetor, BQE parashikoi se rritja e pagave nominale do të binte gradualisht me kalimin e kohës – në 3.3% në 2026-ën nga 5.3% në 2023-shin. Ajo pret që rritja e pagave të kufizohet pasi bizneset t’i kalojnë kostot më të larta konsumatorëve me një ritëm më të ngadaltë.

Anëtarja e Komitetit Ekzekutiv të BQE-së, Isabelle Schnabel, argumentoi se produktiviteti i dobët po përkeqëson ndikimin e rritjes së fortë aktuale të pagave nominale në kostot e punës për njësi për bizneset, duke rritur rrezikun që inflacioni të vonojë uljen në në 2%.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.