Nisin shpronësimet te Bulevardi i ri, 31 milionë dollarë pronarëve – Këshilli i Ministrave publikon listën me 200 pronarët, procedurat brenda 3 muajve
Rishikimi i projektit për segmentin rrugor të vazhdimit të ‘Unazës së madhe’ Tiranë nga ‘Sheshi Shqiponja’–‘Bulevardi i Ri’ dhe ‘Rikualifikimi i ‘Unazës Lindore’ parashikon prishjen e shumë ndërtimeve ekzistuese, të cilat do t’i kushtojnë Qeverisë rreth 31 milionë dollarë. Ka hyrë tashmë në fuqi vendimi për shpronësimet nga të cilat do të preken rreth 200 pasuri, kryesisht të llojit truall bashkë me ndërtimet përkatëse.
Këshilli i Ministrave ka publikuar listën më pronarët e pasurive të paluajtshme, prone private, që shpronësohen për prona të llojit “truall”, “tokë arë” dhe “ndërtesë”. Fatura totale e shpronësimeve shkon në 3.1 miliardë lekë, afërisht 31 milionë dollarë.
Shpronësimi fillon menjëherë pas botimit të këtij vendimit të Qeverisë në Fletoren Zyrtare ndërkohë që afati i përfundimit të shpronësimit duhet të përfundojë brenda 3 (tre) muajve nga data e hyrjes në fuqi të tij
Agjencia Shtetërore e Kadastrës, përcakton Këshilli i Ministrave, brenda 30 ditëve nga data e miratimit të këtij vendimi pasqyron në kartelat e pasurive të paluajtshme informacionin për miratimin e shpronësimit, për interes publik, të pasurive prone private, të cilat preken nga realizimi i projektit.
Po ashtu, Agjencia Shtetërore e Kadastrës pezullon të gjitha transaksionet me pasuritë e shpronësuara, deri në momentin, kur do të realizohen procesi i hedhjes së gjurmës së projektit mbi hartat kadastrale dhe regjistrimi i aktit të kalimit të pronësisë në favor të Autoritetit Rrugor Shqiptar për pasuritë e shpronësuara.
Lorenc Rabeta / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.