Një nga simbolet e Londrës shitet 321 milionë euro – Kulla ikonë e blerë nga amerikanët do të kthehet në hotel luksoz
Kulla ikonë BT e Londrës do të transformohet në një hotel luksoz pasi pronari ra dakord t’i shesë MCR Hotels ndërtesën për 321 milionë euro.
Kulla, një simbol i ringjalljes së Londrës të viteve 1960 të pasluftës me një restorant rrotullues në katin e saj të 34-të, ishte ndërtesa më e lartë e qytetit për 16 vjet derisa u kalua nga një qiellgërvishtëse në distriktin financiar të qytetit të Londrës në vitin 1980. E inauguruar nga kryeministri Harold Wilson në vitin 1965, roli i saj qendror në komunikim është zbehur dhe antenat u hoqën më shumë se një dekadë më parë kur nuk ishin më të nevojshme për të lidhur Londrën me pjesën tjetër të vendit.
Ndërtesa, e cila është e mbrojtur me rregulloren që kufizon ndryshimet arkitekturore, ishte e njohur gjerësisht si Kulla e Postës deri në vitin 1984, kur British Telecom u privatizua. Ajo u mbyll për publikun pasi një bombë shpërtheu në vend në vitin 1971, e cila pretendohej se ishte vendosur nga një grup anarkist i ekstremit të majtë.
Vitet e fundit ka qenë më i njohur për ekranin LED 360 gradë që transmeton mesazhe për ngjarje të mëdha, si lindja e foshnjave mbretërore dhe fitoret sportive.
Drejtori i pronave të BT, tha se kulla, 177 metra e lartë luajti një rol kyç në transmetimin e thirrjeve, mesazheve dhe sinjaleve televizive në Britani, raporton BBC. Sipas tij marrëveshja me MCR Hotels do t’i japë Kullës Britanike të Telekomunikacionit një qëllim i ri dhe kjo ndërtesë ikonë do të ruhet për dekadat e ardhshme.
Analistët besojnë se kjo shitje shënon fundin e një epoke në telekomunikacion për shumë njerëz. Sipas tyre, kulla britanike e telekomunikacionit nuk ishte e aksesueshme për publikun për një kohë të gjatë, kështu që pas shndërrimit të saj në hotel, shumë do të duan të qëndrojnë në atë ndërtesë të famshme.
Dorina Kurtaj /SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.