“Një shëndet”, qasja e re për rritjen e sigurisë ushqimore – 22 milionë euro deri në 2027-ën, forcohen kontrollet në të gjithë zinxhirin
Bujqësia dhe sektorët e biznesit agroushqimor japin një kontribut të rëndësishëm në ekonominë kombëtare. bujqësia ushqimore është në mënyrë direkte dhe indirekte përgjegjës për pothuajse gjysmën e vendeve të punës në mbarë ekonominë në Shqipëri. Megjithatë problemet sporadike lidhur me rastet e sigurisë ushqimore, sëmundjeve tek bimët apo kafshët, sjellin pasoja të mëdha për ekonominë.
Për këtë arsye, qeveria do të zbatojë strategjinë e re të sigurisë ushqimore 2023-2027 të miratuar së fund, e cila konsideron hap kyç njohjen e faktit se siguria e ushqimit, ushqimit të kafshëve, shëndetit të bimëve dhe kafshëve është jetike për rritjen dhe transformimin e sektorit të bujqësisë në Shqipëri dhe mund të kontribuojë pozitivisht në integrimin e Shqipërisë në tregjet ndërkombëtare. Për këtë qëllim do të investohen në total rreth 22 milionë euro.
Kjo politikë miraton qasjen “Një shëndet”, e cila i lejon qeverisë të zbulojë, parandalojë dhe reagojë ndaj sëmundjeve të reja në ndërfaqen njeri-kafshë-mjedis, në mënyrë që të trajtojë më efektivisht çështjet e shëndetit publik të lidhura me ushqimin.
Gjë që do të rriste konkurrencën e produkteve agroushqimore shqiptare, si në tregun e brendshëm, ashtu edhe në atë të jashtëm. Shqipëria po përpiqet ta miratojë këtë parim, duke synuar të sigurojë një qasje koherente dhe të integruar të zbatueshme brenda sistemit kombëtar të kontrollit agroushqimor dhe që kontrollet zyrtare të mbulojnë çdo pikë të zinxhirit agroushqimor.
Përpos forcimit të efektshmërisë së sistemit të kontrollit agroushqimor, strategjia synon forcimin e përputhshmërisë në të gjithë sektorin dhe fuqizimin e konsumatorit, përmes ndërgjegjësimit, për të marrë vendime të informuara.
Elisabeta Dosku/ SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.