NOA i pari institucion që emeton obligacione në Bursën Shqiptare- AMF miraton këtë të premte prospektin: të gjitha mekanizmat gati për emetimin e titujve

Bursa Shqiptare nga kjo javë po kryen për herë të parë funksionin e saj, si platformë ku kompanitë mund të shesin aksionet e tyre për publikun e gjerë. Bordi i Autoritetit të Mbikëqyrjes Financiare ka miratuar në mbledhjen e kësaj të premteje prospektin e parë të një shoqërie tregtare për emetimin e obligacioneve me ofertë publike në Shqipëri.

Bëhet fjalë për kompaninë e mikrofinancave NOA, e specializuar në dhënien e kredive të vogla.

Kjo është hera e parë në historinë e krijimit të një tregu të lirë vendas të kapitaleve, që titujt e një shoqërie i ofrohen publikut të gjerë, duke shënuar një moment të rëndësishëm për këtë treg si dhe duke shërbyer si shembull për emetime të kësaj natyre edhe nga subjekte të tjera, me qëllim sigurimin e aksesit në kapital përmes ofrimit të alternativave të reja të financimit, përtej atyre të kreditimit nga sektori bankar.

Deri tani, tregu i kapitaleve, krahas titujve të Qeverisë, ka qenë i përqendruar te emetimet e obligacioneve me ofertë private, një mjet që është përdorur nga shoqëritë për të gjeneruar likuiditet.

Emetimi për herë të parë i titujve të një shoqërie me ofertë publike i ofron investitorit shqiptar mundësi të reja investimi në shërbim të diversifikimit të portofolit të tij. Sipas Autoritetit të Mbikqyrjes Financiare, ky lloj emetimi pritet të aktivizojë të gjithë mekanizmat ekzistues të tregut të kapitaleve, që lëvizin dhe mbështesin procesin e emetimit dhe tregtimit të titujve, siç janë ndërmjetësit financiarë, Bursa dhe Depozitari Qendror i Titujve, duke verifikuar kështu funksionalitetin e infrastrukturës së tregtimit dhe pastregtimit.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.