Objektivat e BE për energjinë e erës – “Plotësohen brenda vitit 2030 falë investimeve dhe përmirësimit dhënies së lejeve”

Objektivi i Bashkimit Europian për energjinë e erës për vitin 2030 është i arritshëm për shkak të rikthimit të investimeve dhe përmirësimit të procedurave të lejeve. Kjo u konfirmua me anë të një raporti të shoqatës së industrisë.

Në një perspektivë për sektorin deri në vitin 2030, ‘WindEurope’ parashikoi që BE-ja do të instalojë një mesatare prej 29 gigavat në kapacitetin e erës çdo vit, duke rritur kapacitetin e instaluar në 393 GW. Për të përmbushur objektivat klimatike të BE-së, duhet të instalohen 33 GW në vit.

Dy të tretat e instalimeve do të jenë në tokë, por instalimet në det të hapur pritet të rriten me shpejtësi deri në fund të dekadës. Vitin e kaluar, BE instaloi një kapacitet rekord prej 16.2 GW të energjisë së erës, 79% e së cilës ishte në tokë.

Procedurat e lejeve për projektet e reja po përmirësohen për shkak të rregullave të reja të BE-së që synojnë të thjeshtojnë dhe përshpejtojnë procesin. Gjermania dhe Spanja lejuan 70% më shumë instalime në tokë vitin e kaluar sesa në vitin 2022, ndërsa Franca, Greqia, Belgjika dhe Britania panë gjithashtu vëllime më të larta lejesh.

Investimet në kapacitete të reja u rritën gjithashtu vitin e kaluar për shkak të lehtësimit të inflacionit dhe faktorëve të tjerë si paketa e Komisionit Europian për energjinë e erës në tetor, e cila përcaktoi veprime për forcimin dhe mbështetjen e industrisë. Investimet e reja në erën në det të hapur arritën në 30 miliardë euro vitin e kaluar, nga 0.4 miliardë euro në vitin 2022, thuhet në raport.

Zinxhiri i furnizimit me energjinë e erës i Europës po kthehet në fitim dhe po ndërton fabrika të reja të nevojshme për të përmbushur objektivat e BE-së. Aktualisht ka besim se mund të arrihet objektivi i BE-së që era të përbëjë 35% të energjisë elektrike deri në vitin 2030, nga 19% sot – me kusht që Europa të përshpejtojë ndërtimin e rrjeteve për të lidhur të gjitha parqet e reja të erës.

Rreziku kryesor për përmbushjen e objektivit të vitit 2030 është vonesa në lidhjen e fermave të erës me rrjetet elektrike prandaj qeveritë duhet të fokusohen në përshpejtimin e zhvillimit të rrjeteve, thuhet ndër të tjera në raport.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.