Opozita protestë për ekonominë dhe keqqeverisjen! Detajet nga fjalimet/ Meta analizon problemet, Berisha publikon programin alternativ

Nën moton “Protesto, ti dalim zot bashkë Shqipërisë” mijëra qytetarë iu bashkuan protestës së opozitës para kryeministrisë në Tiranë.

Ndryshe nga protestat e tjera, në ligjërimet publike mbizotëruan kërkesat ekonomike kundrejt atyre politike.

Kreu i Partisë së Lirisë, Ilir Meta në fjalimin e tij zgjodhi të analizojë problematikat ekonomike më të  cilat përballet vendi ndërsa kreu i Partisë Demokratike Sali Berisha, zgjodhi të japë alternativën e tij për zgjidhjen e këtyre problematikave.

“Rilindja ka në axhendë shpopullimin. Premtoi 300 mijë vende pune por përzuri 740 mijë shqiptarë. Premtoi luftë kundër varfërisë por sot 67 % e popullsisë jeton me të ardhura më pak se 5.5 dollarë në ditë. Për të varfërit rilindja ka dy alternativa, ose dëbim ose nënshtrim. Drejtësia e Rilindjes dënon qytetarët që nuk paguajnë me pensione të tyre energjinë por nuk vepron ndaj drejtorëve që vjedhin miliarda. Pse ushqimet bazë të mbijetëses janë shumë të të lira në Maqedoni e Kosovë? Asnjë lek nuk shkon për mbrojtjen e qytetarëve nga inflacioni. MBi shpatullat e qytetarëve po bie pesha e rëndë e borxhit publik” tha Meta.

“Përgjysmim taksash, çmim energjie të paktë në 3-4 herë më të ulët sesa sot. Garantojmë konkurencë të ndershme dhe treg të lirë” tha Berisha ndërsa ftoi qytetarët që t’i bashkohen lëvizjes së nisur.

Ndërsa në bulevard opozita protestonte ndër të tjera edhe për keqmenaxhimin e krizës energjetike, një pjesë e ndriçimit publik ishte jashtë funksionit. Kjo, sipas opozitës, ishte tentativë e qeverisë për të fshehur pjesëmarrjen e lartë në protestë

Protesta u mbyll me simbolikën e ndezjes së qirinjve në përkujtim të viktimave të keqqeverisjes.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.