Pa fitues, blerja afatgjatë e energjisë – Tenderi i KESH/ Shkak çmimi i lartë i ofertuar, në garë morën pjesë 3 kompani

Është mbyllur pa fitues procedura e Korporatës Elektroenergjetike Shqiptare për blerjen afatgjatë të energjisë. Sipas të dhënave, të vëna në dispozicion nga KESH për TV SCAN, gara është zhvilluar me marrjen e disa ofertave, por çmimet e larta të ofruara prej tyre nuk i kanë klasifikuar si fituese. Në lotin 1, që parashikonte blerjen e energjisë për një periudhë 3-vjeçare, dorëzuan ofertat e tyre 3 kompani. Shqiptarja GSA ofertoi çmimin prej 188.68 Euro/ mWh, EFT AG e Zvicrës 169.77 euro/ mWh, ndërsa kompania rumune Energy Distribution Services (EDS) ofertoi çmimin prej 250 Eur/mWh.

Ndërkaq, sa i takon lotit 2, që përfshinte blerjen e energjisë për një periudhë 5-vjeçare u dorëzuan 2 oferta nga të njëjtat kompani të huaja. Kompania zvicerane ofertoi 155.77 Euro/mWh, ndërsa ajo rumune 250 euro/mWh. Ndërkaq, interes shfaqën edhe 2 komapni të tjera, por ato nuk e kaluan fazën e parakualifikimit. Gara për blerjen afatgjatë të energjisë u hap në mesin e muajit mars, ndërkohë që ajo ishte një praktikë e pazakontë për Korporatën Elektorenergjetike Shqiptare, që i kryen procedurat e blerjeve, kryesisht me baza ditore.

Gjithsesi, ndërmarrja e saj në këtë kohë është kritikuar nga ekspertët për shkak të paqëndrueshmërisë së çmimeve në tregje, por edhe mundësive të zhvillimit të Bursës Shqiptare të Energjisë Elektrike, që tashmë ka nisur operimet. Vetë KESH e argumentoi hapjen e procedurës me detyrimin për të përmbushur të gjithë konsumin e brendshëm për tensionin e ulët dhe të mesëm.

OFERTAT PËR BLERJEN 3-VJEÇARE TË ENERGJISË

GSA  sh.a.,  Shqipëri                                                         188.68 Eur/mWh

EFT AG,  Zvicër                                                             169.77 Eur/mWh 

ENERGY DISTRIBUTION SERVICES SRL, Rumani      250 Eur/mWh

OFERTAT PËR BLERJEN 5-VJEÇARE TË ENERGJISË

EFT AG, Zvicër                                                               155.77 Eur/mWh

ENERGY DISTRIBUTION SERVICES SRL, Rumani      250 Eur/mWh

Ola Mitre / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.