Pa kontrata afagjata energjia po blihet 2-fish më shtrenjtë – “Fluturojnë” shifrat e gushtit, shpenzohen 18 mln euro në vetëm 2 procedura

Mungesa e kontratave afatgjata për blerjen e energjisë po i kushton shtrenjtë Korporatës Elektroenergjetike Shqiptare, që aktualisht po siguron energji me çmime mbi 2-fish më të larta se muaji maj apo qershor.

Sipas të dhënave të përpunuara nga TV SCAN, çmimi mesatar me të cilin KESH bleu energjinë në mujian korrik arriti në 418 euro/MWH, ndërsa për gushtin janë kryer 2 proceura me çmim mesatar prej 493 euro/mëh. Këto çmime janë ndjeshëm më të larta, në krahasim me majin apo qershor ku për 1 Mwh u pagua respektivisht 200 euro dhe 220 euro. Referuar të dhënave të publikuar nga KESH nga muaji maj e deri më tani janë kryer në 22 procedura për blerjen e energjisë, duke siguruara energjinë me baza ditore ose javore.

Ndërkohë që, nëse KESH do të kishte lidhur një kontratë pëer blerje energjie në muajin maj, për 2 procedurat e kryera në gusht nuk do të ishin paguar 18 mln euro, por 7 mln euro. Sigurimi i kontratave afatgjata të energjisë ishte një nga pikat kryesore të vendimit të qeverisë, që u miratua në tetor të vitit të kaluar në kuadër të emergjencës së furnizimit me energji të shpallur nga Këshilli i Ministrave e që synonte përballimin e situatës.

Vendimi lejonte nënshkrimin e këtyre kontratave, edhe për periudha deri në 3 vjet, por gjithsesi KESH vijon të blejë energjinë në baza ditore ose javore, duke u prekur drejtpërdrejt nga rritja e çmimeve të energjisë në tregjet ndërkombëtare. Në total, që nga muaji maj e deri më tani KESH ka shpenzuar 120.74 mln euro për blerjen e energjisë, ndërkohë që gjithë vitin fatura ka arritur në gati 207 mln euro.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.