“Paga minimale në 60 mijë lekë” – Rama thirrje bizneseve: Rrisni standardet punonjësve! Jeni në konkurrencë me vendet e zhvilluara!

Kreu i Qeverisë Edi Rama gjatë një takimi me përfaqësues të biznesit nga qyteti i Durrësit deklaroi se punëtorët janë objektivi kryesor i qeverisë. Rama gjithashtu u shpreh se qëllimi kryesor i qeverisë është që viti 2023 të jetë viti i turizmit për Shqipërinë, duke i dhënë kështu mundësinë bizneseve rritjen ekonomike.

“Po rritet alarmi për mospërmbushjen e vendeve të punës me krahë pune se nuk ka më në Gjermani aq të rinj sa i duhen ekonomisë gjermane për të vijuar ajo që është. Kjo është problematika e të gjitha vendeve që do shpërthejë fare. Gara për të tërhequr krahë pune në anën tënde do jetë gara e çdo vendi. Gjermania po rend prej kohësh që të ketë sa më shumë dhe i duhen miliona, jo disa dhjetëra mijëra që nuk ia jep më dot procesi i lindjeve brenda. Ne jemi në pikën që është tani momenti i kthesës së madhe, tërmeti, pandemia dhe tani rritja e pagave.”- u shpreh kryeministri Rama.

Kryeministri u bën thirrje pronarëve të bizneseve të rrisin standardet punonjësve pasi konkurrenca është shumë e lartë krahasuar me vendet e zhvilluara.

“Merreni si detyrë patriotike këtë. Jemi në kohën e një luftë për mish njeriu. Vendet e zhvilluara do bëjnë çmos të thithin sa më shumë njerëz, nuk ka ku ti gjejnë, ata nuk lindin më. Ne duhet që patjetër të mos humbim më tepër madje edhe t’i kthejmë ata që kanë ikur këtu. Sot nuk jemi në fazën që u themi shqiptarëve që janë jashtë “hajde kthehuni ore”.”- theksoi Rama

Ndër të tjera në fjalën e tij, Rama theksoi se qeveria rriti pagat dhe se është radha e biznesit për kthesën e madhe.

“Kishim pagën minimale më të ulët në rajon. Sot jemi të tretët në rajon për pagën minimale dhe do ta çojmë ta rrisim në 45.0000 brenda mandatit dhe pa shkuar në 60.000 nuk na zë gjumi sepse nuk mjafton”. u shpreh Rama.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.