Paga minimale në Greqi bëhet 830 euro – Rritet dhe pagesa e papunësisë në 510 euro

Duke filluar nga 1 prilli paga minimale në Greqi është 830 euro, nga 780 euro më parë. Kjo rritje prek sektorin privat ku përfshihen 600 mijë punonjës. Norma e rritjes së re, e katërta në pesë vjet arrin në 6.5%, pra 50 euro bruto.

Brenda një periudhe trevjeçare, paga e re minimale bruto prej 830 euro do të rritet në 913 euro bruto, pra 762 euro neto. Me vendosjen e pagës minimale, pagesa e papunësisë që marrin rreth 140 mijë të papunë rritet në 510 euro, nga 479 euro.

Njëkohësisht shtesa e posaçme e lehonisë, shtesa për pushim prindëror dhe ajo për fitimin e përvojës së punës rritet nga 780 në 830 euro. Gjithashtu, shtesa për të vetëpunësuarit nga 479 euro rritet në 510 euro.

Bëhet me dije se 100 mijë punonjës që paguhen me pagën minimale do të kenë rritje, pasi këtë vit u aktivizua pagesa e vjetërsisë – tre vjet – që mbeti e “ngrirë” që prej 14 shkurtit 2012.

Për këtë vit numri i përfituesve nuk është i madh, vetëm 100 mijë persona, por në tre vjet numri i tyre llogaritet të shkojë në 600 deri në 700 mijë persona.

Punonjësi me kohë të plotë me kontratë trevjeçare në vitin 2024 do të ketë 10% rritje, 78 euro shtesë në muaj. Rrjedhimisht, punonjësi me kohë të pjesshme me kontratë 390 euro për 4 orë punë do të ketë rritje prej 39 euro.

Me rritjen e pagës minimale në 830 euro, shtesa trevjeçare rritet në 83 euro dhe punonjësit me kontratë trevjeçare do të marrin 913 euro.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.