Pakistani, i rëndësishëm në Kupën e Botës – Vendi prodhon numrin më të madh të topave që përdoren në kampionat

Dhe pse një vend i dhënë më shumë pas kriketi-t, Pakistani po luan një rol shumë të rëndësishëm në Kampionatin Botëror të Futbollit duke prodhuar topat që përdoren në fushat stërvitore në Katar dhe kopjet që u shiten tifozëve në mbarë botën.

Forward Sports, një kompani shumëkombëshe e pajisjeve sportive në qytetin verilindor të Sialkot, bashkëpunon me Adidas prej rreth 20 vitesh. Kompania është prodhuesi i dytë i topit zyrtar të Kupës së Botës në Katar.

Gjithsej janë prodhuar 5.5 milionë topa zyrtarë, përfshirë këtu dhe 60 mijë kopje me cilësi të lartë të topave të përdorura gjatë ndeshjeve. Ata përdoren nga skuadrat ndërsa stërviten në Katar dhe u shiten si një produkt entuziastëve të futbollit në të gjithë globin, ndërsa pjesa tjetër shiten si topa me çmime më të ulëta për kohën e lirë dhe suvenir. Topat e ndeshjes janë prodhuar në Kinë. Adidas nuk pranoi të identifikonte prodhuesin.

Punëtorët në fabrikë shprehen se cilësia e mirë e prodhimit është rezultat i përkushtimit, aftësive dhe dashurisë së madhe për futbollin. Dhe pse ky sport ka shumë tifozë në vend, kombëtarja e Pakistanit renditet në vendin e 194 nga 211 sipas vlerësimit të FIFA-s.

Pakistani mbetet një nga prodhuesit më të mëdhenj në botë të topave të futbollit, së bashku me Kinën dhe Indinë. Dhoma vendore e tregtisë tha se më shumë se 43 milionë topa me vlerë 191 milionë dollarë u prodhuan në Sialkot në vitin financiar 2021/22.

8% e popullsisë së Sialkot prej rreth 1 milion njerëz punojnë në këtë industri, por shumë thonë se kanë pak kohë për ta parë produktin e tyre në veprim.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.