Pandemia rriti numrin e lejeve të lindjes – Mbi 16 mijë gra përfituese, kryesojnë punonjëset në privat

Përpos efekteve negative që ka sjellë në ekonominë e vendit, punësim dhe në jetën e qytetarëve në tërësi, pandemia duket se ka ndikuar pozitivisht në rritjen e lindshmërisë.

Sipas të dhënave zyrtare të Institutit të Sigurimeve Shoqërore të përpunuara nga TV SCAN, përgjatë vitit që lam pas afro 16.336 gra kanë përfituar leje lindje më të drejtë pagese nga buxheti i sigurimeve shoqërore. Shifra është në rritje progresive në 5 vitet e fundit, ndërsa  rezultojnë mbi 2 mijë përfituese më shumë se ne vitin para pandemisë 2019.

Shumica prej tyre apo afro 6585 janë punonjëse në firma private, duke u ndjekur nga gratë që rezultojnë të vetëpunësuara në bujqësi, ku kanë përfituar leje lindje 5525 gra. Më pak leje të dhëna figurojnë për gratë e punësuara në institucionet buxhetore apo të vetëpunësuara të cilat në total së bashku regjistrohen në shifrën e 4 mijë përfitueve.

Kjo pagesë e dhënë nga buxheti i ISSH, korrespondon me 80 për qind të pagës neto për gratë e punësuara që marrin leje lindje, për 6 muajt e pare, dhe më pas për periudhën tjetër reduktohet në 50 për qind.

Po ashtu kjo kategori përfiton edhe një shpërblim në rast se të dy bashkëshortët janë në marrëdhënie pune si dhe bonusin, I cili është 40 mijë lekë për fëmijën e parë, 80 mijë lekë për fëmijën e dytë dhe 120 mijë lekë për fëmijën e tretë.

Elisabeta Dosku / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.