Paqartësitë e euros prekin edhe kreditimin – Rënie e huave në monedhën europiane për blerjen e pasurive të paluajtshme dhe overdraft
Jo vetëm depozitat, por edhe kredia po vuan paqartësitë e monedhës së përbashkët europiane në tregun financiar shqiptar. Në fund të muajit maj, kredia në euro ka shënuar një rënie të fortë krahasuar me një vit më parë në thuasje të gjithë komponentët e saj. Sipas të dhënave zyrtare të Bankës së Shqipërisë, totali i kredive në euro ka rënë në 10 miliardë lekë nga 12.3 miliardë në muajin e mëparshëm. Shifrat janë dukshëm në rënie krahasuar me majin e një viti më parë, kur kredia në euro arrinte një ekuivalent prej 14.2 miliardë lekësh.
Ndërkaq, duke zbërthyer komponentët e saj, bie në sy se është overdrafti ai që ka pësuar rënien më të madhe. Nga 9.2 miliardë lekë në muajin prill, overdrafti ka rënë në 6.9 miliardë në fund të majit, ndërkohë që ka mbetur thuajse e pandryshuar kredia për kapital qarkullues e marrë në monedhën e përbashkët europiane, e cila nga 3.1 miliardë lekë në prill, rezulton 3 miliardë lekë në total në maj.
Ndërkaq, në rënie është edhe kredia për blerje pasurish të paluajtshme në euro, që shënoi një rritje të fortë muajt e fundit për shkak të rritjes më të shpejtë të normave të interesave për kredinë në lekë.
Aktiviteti kreditues i bankave vijon edhe këto muaj tendencën ngadalësuese në bazë vjetore, megjithëse me një rritje të lehtë krahasuar me një muaj më parë. Totali i huave është rritur në 682.4 miliardë lekë, nga 690.6 miliardë në fund të muajit prill.
Lorenc Rabeta/SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.