Paraja në qarkullim jashtë bankave, tjetër rekord – Volumi u rrit në 409.3 miliardë lekë në korrik, nga 408.7 miliardë në qershor
Pas rritjes së ndjeshme në Qershor, volumi i parave që qarkullojnë jashtë bankave në vend ka shënuar një tjetër rekord në korrik. Në fund të korrikut, volumi i parave në qarkullim jashtë sistemit bankar rezultoi në vlerën rekord prej 409.3 miliardë lekësh, nga 408.7 në qershor. Në muajin prill, volumi i parave jashtë sistemit bankar ishte 399,5 miliardë. Në janar të këtij viti ishte regjistruar edhe rekordi i mëparshëm, kur totali i parave në qarkullim kaloi nivelin e 402 miliardë lekëve.
Shifrat janë shumë më të larta po t’i karahasojmë me vitet e mëparshme. Në janarin e vitit 2022, totali i parave që qarkullonin jashtë bankave ishte pak më shumë se 376 miliardë lekë, thuajse 25 miliardë lekë, apo rreth 340 milionë euro më pak nga sa qarkullojnë aktualisht. Ky tregues ka ardhur në rritje përgjatë gjithë vitit të shkuar për të kulmuar në fund të tij në mbi 400 miliardë lekë.
Ndërkohë që si fenomen i përket periudhës së Pandemisë. Të dhënat historike tregojnë se në 2020-n, është shënuar rritja më e fortë vjetore, me 53 miliardë lekë, ose +18%, që nga viti 2002. Në fund të vitit 2020, jashtë sistemit bankar qarkullonin 344 miliardë lekë (2.8 miliardë euro), sipas statistikave të publikuara nga Banka e Shqipërisë.
Në raport me paranë gjithsej, jashtë sistemit bankar qarkullonte në fund të dhjetorit të vitit 2019, 23.6% e totalit. Paraja jashtë bankave ka pasur tendencë rritëse të vazhdueshme duke pasqyruar edhe nivelin e lartë të informalitetit të ekonomisë shqiptare.
Lorenc Rabeta/SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.