Paralajmërimi i fortë i Yellen: “Mospagimi i borxhit të SHBA-së do të shkaktonte një katastrofë ekonomike”!

Sekretarja e Thesarit e SHBA-së, Janet Yellen paralajmëroi se dështimi i Kongresit për të rritur tavanin e borxhit të qeverisë – dhe mospagimi që do të pasonte – do të shkaktonte një “katastrofë ekonomike” që do t’i çonte normat e interesit më të larta për vitet në vijim. Yellen, në fjalën e saj para disa drejtuesve biznesi nga Kalifornia, tha se një mospagim i borxhit të SHBA-së do të rezultonte në humbje të vendeve të punës, ndërkohë që do të rriste pagesat e familjeve për hipotekat, kreditë e automjeteve dhe kartat e kreditit.

Ajo tha se ishte një “përgjegjësi themelore” e Kongresit për të rritur ose pezulluar kufirin e huamarrjes prej 31.4 trilion dollarësh, duke paralajmëruar se një mospagim do të kërcënonte përparimin ekonomik që Shtetet e Bashkuara të Amerikës kanë bërë që nga pandemia COVID-19.

Sipas saj, nëse tavani i borxhit nuk rritet, bizneset amerikane do të përballen me përkeqësimin e tregjeve të kredisë dhe qeveria ka të ngjarë të mos jetë në gjendje të lëshojë pagesa për familjet ushtarake dhe të moshuarit që mbështeten te Sigurimet Shoqërore. Ajo theksoi se kongresi duhet të votojë për të rritur ose pezulluar kufirin e borxhit. Ai duhet ta bëjë këtë pa kushte. Dhe nuk duhet të presë deri në minutën e fundit.

Yellen u tha ligjvënësve në janar se qeveria mund të paguante faturat e saj vetëm deri në fillim të qershorit pa rritur kufirin. Në ndryshim nga shumica e vendeve të tjera të zhvilluara, SHBA vendos një kufi të vështirë për sa mund të marrë hua. Për shkak se qeveria shpenzon më shumë sesa merr, ligjvënësit duhet të rrisin periodikisht tavanin e borxhit.

Kevin McCarthy, kreu i Dhomës së Përfaqësuesve të kontrolluar nga republikanët, javën e kaluar paraqiti një plan që do të dyfishonte 4.5 trilion dollarë reduktimet e shpenzimeve me një rritje prej 1.5 trilion dollarësh të kufirit të borxhit, duke e quajtur atë bazën për negociatat në javët e ardhshme.

Shtëpia e Bardhë këmbëngul se dy çështjet nuk duhet të lidhen dhe Senati i kontrolluar nga demokratët ka të ngjarë ta refuzojë propozimin. Tregjet financiare po shqetësohen gjithnjë e më shumë për bllokimin, duke e çuar koston e sigurimit të ekspozimit ndaj borxhit të SHBA në nivelin më të lartë në një dekadë, me analistët financiarë që paralajmërojnë për rrezikun në rritje të mospagimit.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.