Pas rënies në 2022, ringrihen fondet e investimeve – Rritet si volumi i aseteve, ashtu edhe numri i investitorëve. Mbi 30 mijë në 2023

Pas një viti mjaft të vështirë për shkak të pasojave që solli veccanërisht konflikti në Ukrainë në fillim të 2022, fondet e investimeve kanë nisur të rimarrin veten gjatë gjysmës së parë të këtij viti. Ndërkaq, Autoriteti i Mbikqyrjes Financiare raporton se në përmirësim për gjysmën e parë të këtij viti, vjen si numri i anëtarëve të fondeve, ashtu vlera e aseteve të investuara përmes tyre.

Sipas të dhënave zyrtare për tregun e fondeve të investimeve në 30.06.2023, vlera neto e aseteve të Fondeve, arriti rreth 43.30 miliardë lekë me një rritje prej 1.83 miliardë lekë ose 4.42%, krahasuar me fundin e vitit 2022, i cili u mbyll me një total asetesh prej 41.4 miliardë lekësh. Ndërkaq, numri i anëtarëve që kanë investuar në Fondet e Investimit më 30.06.2023 është 30,077 me një rritje prej 3.91% krahasuar me 31.12.2022.

Kujtojmë se viti 2022 ishte tejet i vështirë për trembëdhjetë fondet e investimeve që ushtrojnë aktivitetin në vend. Shkak u bë rritja e shpejtë e normave të interesit nga ana e Bankës së Shqipërisë, e cila zhvleftësoi, duke ccuar në territor negativ, kthimet nga fondet e investimeve. Kjo u shoqërua me tërheqje të shpejtë të fondeve nga shumë investitorë. Numri i anëtarëve ra nga 40,054 në 28,953 brenda vitit, ndërkohë që asetet nga 73 miliardë lekë, ranë me 47% në 38.6 miliardë lekë, ose thuajse duke u përgjysmuar.

Ky treg dominohet kryesisht nga investimet në Obligacione Qeveritare, të cilat përbëjnë 72.71% të aseteve të fondeve, me një rritje prej 6.19% krahasuar me 31.12.2022.

Fondet e Investimit janë një alternativë investimi relativisht e re për tregun financiar shqiptar dhe ofrojnë një mundësi diversikimi të aseteve të investitorëve. Fondet e investimit janë grupim asetesh të cilat investohen nga shoqëria administruese përmes strategjive të investimit duke krijuar në këtë mënyrë portofole investimi të cilat janë shumë të vështira për t’u krijuar nga një investitor individual në mënyrë të pavarur. Rezultatet e tyre financiare jane te lidhura fort me inflacionin, pasi duke qenë i përqendruar te obligacionet, ato varen shumë te rritja e normës bazë të interesit.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.