Pasagjerët duhet të peshohen përpara se të hipin në avion – Një tjetër linjë ndërkombëtare ndërmerr masën e pazakontë!
Air New Zealand do t’u kërkojë pasagjerëve të peshojnë veten përpara se të hipin në fluturimet ndërkombëtare në një provë që synon të përmirësojë efikasitetin e karburantit.
Transportuesi tha se gjatë javëve të ardhshme do t’u kërkojë më shumë se 10 mijë klientëve që udhëtojnë në rrjetin e saj ndërkombëtar që të marrin pjesë në studimin e peshës së pasagjerëve përpara se të hipin.
Air New Zealand tha që pilotët duhet të dinë peshën dhe ekuilibrin e avionit të ngarkuar përpara çdo ngritjeje. Masa vjen pas një rikthimi në udhëtimet ndërkombëtare gjatë vitit të kaluar apo më shumë pas heqjes së kufizimeve të Covid-19.
Kompania më parë peshonte udhëtarët në fluturimet e saj të brendshme në 2021. Air New Zealand tha se sondazhi i saj do të bëhet në hyrje të sallës së portës së disa fluturimeve që nisen nga Aeroporti Ndërkombëtar i Auckland midis 29 majit dhe 2 korrikut.
Nuk është linja ajrore e parë që u kërkon udhëtarëve të peshojnë para fluturimit. Linja ajrore finlandeze Finnair filloi të peshojë pasagjerët e saj në vitin 2017, me synimin për të përditësuar të dhënat e vjetra mbi një dekadë mbi peshën mesatare të pasagjerëve.
Kjo për shkak se shumë transportues ende përdorin të dhëna nga Agjencia Europiane e Sigurisë së Aviacionit, e njohur tani si Agjencia e Sigurisë së Aviacionit të Bashkimit Europian, që daton në vitin 2009.
Edel Strazimiri / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.