Përplasje Qeveri-QKB për aksionerët e fshehtë, u kthehen gjobat – Vendimi: Kompanive t’u rimbursohen në llogaritë bankare brenda 60 ditëve penalitetet e paguara

Ndërsa në sitin zyrtar të Qendrës Kombëtare të Biznesit njoftimi i parë që shfaqet është paralajmërimi për gjobat ndaj biznesve që nuk zbardhin pronarët e vërtetë, Qeveria ka vendosur në mbledhjen e fundit që jo vetëm të falë gjobat, por edhe t’u kthejë nëpër llogari penalitetet e paguara gjatë këtyre muajve. Vendimi është marrë në Këshilli i Ministrave në mbledhjen e së mërkurës dhe është publikuar tashmë në faqen e saj zyrtare. Vendimi përcakton se kompanive të cilave u janë falur gjobat, do u kthehen shumat e paguara në llogaritë bankare brenda 60 ditëve nga ana e Qendrës Kombëtare të Biznesit.

Në pikën 2 të vendimit, Këshilli i Ministrave përcakton se “Subjektet, të cilave u është falur gjoba e paguar, e vendosur ndaj tyre dhe përfaqësuesve të tyre ligjorë dhe kanë përmbushur detyrimet përkatëse për regjistrimin e pronarëve të tyre përfitues, paraqesin pranë Qendrës Kombëtare të Biznesit kërkesën për rimbursim, jo më vonë se data 15.12.2022”.

Ndërkaq pika 3 përcakton që Qendra Kombëtare e Biznesit pas paraqitjes së dokumentacionit, brenda 60 (gjashtëdhjetë) ditëve kalendarike, kryen rimbursimin e gjobës në të njëjtën masë (ekuivalente në lekë) në llogarinë bankare, të përcaktuar nga subjekti përfitues.

Vendimi vjen në një kohë kur Qendra Kombëtare e Biznesit ka rritur tonet me kompanitë që nuk zbardhin dokumentacionin për pronarët përfitues. Në njoftimin që aktialisht hap faqen zyrtare ajo paralajmëron se përtej gjobave, do u ndërpresë shërbimet kompanive që nuk respektojnë ligjin për zbardhjen e të dhënave mbi pronarët përfitues.

Ligji për pronarët përfitues është miratuar që në vitin 2020, dhe afati për depozitimin e të dhënave ishte pikërisht vera e atij viti. Vlerësohet se janë në total rreth 60 mijë kompani të cilat kanë detyrimin për zbardhjen e pronarëve përfitues apo zotëruesve fundorë të aksioneve, në një kohë që penalitetet për mosrespektimin e tij janë shumë të kripura dhe arrijnë deri në 6 mijë dollarë.

Lorenc Rabeta/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.