‘Perspektiva e inflacionit nuk jep shenja përmirësimi’ – BQE synon rritjen e radhës së normave të interesit!

Perspektiva e inflacionit të eurozonës ka dështuar të përmirësohet që nga rritja e normës në muajin korrik. Deklarata u bë nga anëtarja e bordit drejtues të Bankës Qendrore Europiane Isabel Schnabel, e cila la të kuptohej se mbështet një rritje tjetër të madhe të normës së interesit muajin e ardhshëm edhe pse rreziqet e recesionit po forcohen.

Banka Qendrore Europiane befasoi investitorët me një rritje të normës me 50 pikë bazë muajin e kaluar me frikën se inflacioni, që tani po i afrohet territorit dyshifror, rrezikon të rrënjoset.

Por Schnabel e cila është në krye të operacioneve të tregut të BQE-së, shtoi se kjo lëvizje nuk ishte e mjaftueshme për të ndryshuar perspektivën e inflacionit, madje edhe një recesion më vete nuk do të mjaftonte për të zbutur presionet e çmimeve.

Një rritje e mëtejshme e normës në muajin shtator shihet si një marrëveshje e përfunduar, por duhet ende të merret një vendim midis 25 dhe 50 pikë bazë.

Problemi është se në nivelin e 8.9%, inflacioni është më shumë se katërfishi i objektivit të BQE-së prej 2% e mund të vazhdojë të rritet dhe më shumë, edhe pse rritja e kostove të energjisë zvogëlon fuqinë blerëse dhe rritjen e ngadaltë. Schnabel u shpreh se do të duhet pak kohë derisa inflacioni të kthehet në 2%.

Megjithëse inflacioni ka të ngjarë të ngadalësohet ndjeshëm në vitet e ardhshme, Schnabel vuri në dukje se parashikimet e Bankës Qendrore Europiane kanë qenë të gabuara në tremujorët e fundit, kështu që shifrave aktuale të rritjes së çmimeve duhet t’u jepet më shumë peshë në vendimet e politikës.

Ndërsa një recesion do të zbuste presionet e çmimeve, në vetvete nuk do të jetë e mjaftueshme për të rikthyer inflacionin në objektivat e vendosura. Schnabel sqaroi se dhe nëse hyjmë në një recesion, ka shumë pak gjasa që presionet inflacioniste të ulen vetë.

Rritja e normës së interesit do të rrisë kostot e huamarrjes në mënyrë disproporcionale në periferinë e bllokut të 19 vendeve, duke vënë në rrezik më të madh vendet me borxhe si Italia apo Greqia.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.