Prani e ulët e investitorëve, bonot pranë minimumit – Interesi mesatar 3.16% këtë javë, bien edhe yieldet e instrumenteve afatgjatë

Normat e interesit të letrave me vlerë të Qeverisë kanë shënuar nivele shumë të ulëta, fare pranë kufirit prej 3%, të normës bazë të vendosur që në fillim të këtij viti nga Banka e Shqipërisë. Në ankandin e kësaj jave bonot me maturim 12-mujor janë shitur me normën mesatare 3.16, një rritje e papërfishme nga norma 3.13% e shënuar në ankandin e mëparshëm.

Yieldi më i ulët u shënua në qershor, 3.09, fare pranë normës bazë të interesit të Bankës së Shqipërisë. Duket se rënia e interesit për të investuar në letra me vlerë të Qeverisë është edhe faktori kryesor i normave kaq të ulëta.

Në ankandet e fundit vërehet se shuma e vënë në dispozicion nga investitorët për të blerë bono është thuasje sa shuma e shpallur nga Qeveria. Në ankandin e kësaj jave, shuma e shpallur nga Ministria e Financave ishte 7.2 miliardë lekë, ndërkohë që shumë e vënë në dispozicion nga blerësit ishte 8.6 miliardë lekë.

Për të kuptuar sa e ndjeshmë është rënia e vëmendjes ndaj bonove, kujtojmë se në qershor, shuma e shpallur nga Ministria e Financave ishte 7 miliardë lekë, ndërsa kërkesa nga investitorët mbi 11 miliardë lekë.

Rënia e yield-eve ka qenë e përgjithshme ndonëse më e dalluar tek yield-i 12-mujor. Me vonesa kohore normale, ajo është përcjellë më pas dhe tek maturitetet afatgjata. Yield-et e obligacioneve regjistruan mesatarisht një ulje prej 0.40 pikë përqindje nga nivelet e tyre në tremujorin e parë.

Kurba e yield-eve ka pasqyruar këto zhvillime duke ulur nivelin e saj krahasuar me tremujorin e parë të vitit. Në krahasim me një vit më parë, ajo mbetet më e lartë, po është më e sheshtë, si rrjedhojë e kërkesës më të lartë në maturitetet mesatare dhe të gjata dhe rënies më të madhe të këtyre yield-eve.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.