Projekti i “Epokës së re” në Kinë – Në objektiv martesa dhe lindja e fëmijëve

Kina do të nisë projekte në më shumë se 20 qytete për të krijuar një kulturë “epoke të re” për martesën dhe lindjen e fëmijëve, masa e fundit e marrë nga autoritetet për të rritur shkallën e lindjeve.

Shoqata e Planifikimit Familjar, organi kombëtar që zbaton masat e qeverisë për popullsinë, do të nisë projekte që synojnë të inkurajojnë gratë të martohen dhe të lindin, sipas raportimeve të Global Times. Fokusi është në promovimin e martesës, lindjen e fëmijëve në një moshë të përshtatshme, inkurajimin e prindërve që të marrin pjesë në mënyrë të barabartë në rritjen e pasardhësve të tyre dhe shtypjen e zakoneve të vjetruara si “blerja e nuses”.

Projektet e reja bazohen në një sërë masash ekzistuese të zbatuara nga provincat kineze për të inkurajuar qytetarët të bëhen prindër, të tilla si lehtësirat e taksave, strehimi i subvencionuar dhe arsimi falas për fëmijën e tretë. Nga viti 1980 deri në vitin 2015, Kina zbatoi politikën “një fëmijë”, e cila çoi në ndryshime demografike. Kufiri që atëherë është rritur në tre fëmijë.

Të shqetësuar për rënien e parë të popullsisë në 60 vjet dhe një popullsi në plakje, këshilltarët e qeverisë propozuan në mars që gratë e pamartuara të lejohen të ngrijnë vezët e tyre dhe t’i nënshtrohen fekondimit in vitro, disa nga masat që duhet të rrisin normat e fertilitetit. Shumë gra nuk kanë fëmijë për shkak të kostove të larta të produkteve për ë fëmijë ose sepse do t’u duhej të ndalonin karrierën e tyre dhe diskriminimi gjinor është ende një problem i madh në vend.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.