Bien shitjet e telefonave celularë – Në Europën perëndimore ranë me 9.4% tremujorin e parë

Tregu europian i telefonave celularë po lëviz nën hijen e pasigurisë ekonomike dhe presioneve inflacioniste. Të dhënat në Europë ishin negative në tremujorin e parë të vitit 2023, megjithatë, më të buta se ato globale. Shitjet e telefonave inteligjentë në Europën Perëndimore, në tre muajt e parë të vitit, ranë me 9.4%, krahasuar me një vit më parë, që është rënia më e vogël e çdo tregu individual në planet.

Tregu europian i smartfonëve u përball me faktorë të pafavorshëm në tremujorin e parë, si kërkesa e ngadaltë, inflacioni dhe pasiguritë makroekonomike. Në të njëjtën kohë, konsumatorët vazhdojnë t’i japin përparësi udhëtimeve dhe argëtimit në krahasim me blerjet e smartfonëve. Sipas International Data Corporation – IDC , industria po kalon një periudhë shkatërrimi. Aktorët e tregut mbeten të kujdesshëm, duke marrë një qasje konservatore ndaj inventarëve për të shmangur situatat e pakëndshme.

Në tregun botëror, të dhënat ishin negative me 14.6% në tremujorin e parë të 2023 – shit, ndërsa në tregjet e zhvilluara, si SHBA, rënia u përmbajt në 11.5%. Në Kinë ulja ishte e nivelit të 12%. Në të kundërt, tregjet në zhvillim ranë më shumë, me 17%-20%. Në nivel global, 268.6 milionë pajisje u shitën në tre muajt e parë të këtij viti, sipas të dhënave paraprake nga IDC, të përfshira në Worldwide Quarterly Phone Tracker. Kjo rënie shënon tremujorin e shtatë radhazi të rënies. Dhe ndërsa është më e lartë se 12.7% e parashikuar fillimisht, rezultatet nuk i habitin analistët. Duke përjashtuar rastet e paparashikuara, IDC pret që tregu të kalojë në territor pozitiv në tremujorin e tretë të 2023 – shit dhe në rritje të shëndetshme dyshifrore deri në tremujorin e fundit të vitit fiskal.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.