Pronarët përsëri të pakënaqur, kompensimi jo mbi 10% e vlerës – Hyjnë në fuqi ndryshimet ligjore, subjektet ftohen të heqin dorë nga gjykatat e t’i drejtohen ATP

Ndryshimet në Ligjin e Trajtimit të Pronave të sapomiratuara nga Kuvendi kanë hyrë tashmë në fuqi me publikimin në Fletoren Zyrtare pas më shumë se një viti e gjysmë zvarritje. Ndryshimet u përcaktun si detyrim për shtetin shqiptar fillimishit nga Gjykata e Strasburgut dhe më pas nga Gjykata Kushtetuese, ku më thelbësori ishte kushti që pronarët të përfitonin minimalisht 10% të vlerës së pronës. Më specifikisht, kushtet e vendosura nga Gjyakata e Strasburgut për shtetin shqiptar ishin këto: së pari, të trejtojë në mënyrë ezauruese, pothuajse 7 000 kërkesa të patrajtuara, për njohjen e së drejtës së pronës; Së dyti, të sigurojë kompensimin e jo më pak se 10% të vlerës totale, që do të kishin përfituar kërkuesit, nëse vlerësimi financiar do të ishte kryer duke iu referuar zonës aktuale kadastrale të pasurisë së shpronësuar; dhe së treti, të parashikojnë indeksimin e shumës së kompensimit deri në pagesën përfundimtare dhe zbatimin e Konventës në praktikë.

Në dukje, ndryshimet adresojnë kushtin që pronarët të mos përfitojnë më pak se 10% të vlerës reale të pronës, por në variantin përfundimtar, nuk mungojnë as rastet kur ata përfitojnë zero kompensim. “Në rastet kur vlera e pronës së kthyer është më e madhe sesa vlera e pronës së njohur për kompensim, atëherë vlerësimi financiar i vendimit përfundimtar, që ka njohur të drejtën e kthimit dhe kompensimit të pronës, është i barabartë me zero lek dhe subjekti i shpronësuar konsiderohet i kompensuar”, përcakton pika “ç” e nenit 2.

Në dispozitat kalimtare të Ligjit të ndryshuar pronarët ftohen të heqin dorë nga paditë në gjykata, dhe t’i drejtohen Agjencisë së Trajtimit të Pronave për zgjidhje.

Subjektet që kanë tërhequr kërkesat e patrajtuara për njohjen e pronës ose i janë drejtuar gjykatës së shkallës së parë, sipas parashikimit të pikës 2 të nenit 34, para hyrjes në fuqi të këtij ligji, kanë të drejtë të heqin dorë nga gjykimi i çështjes dhe të paraqesin kërkesë pranë Agjencisë për shqyrtimin e dosjes, thekson ligji i ndryshuar. Kur subjekti nuk heq dorë nga gjykimi i çështjes, gjykata kryen njohjen e së drejtës së pronësisë në përputhje me parashikimet e ligjit, thekson më tej dispozita. Shoqatat e pronarëve kanë deklaruar që në fillim të publikimit të draftit, se do ta dërgojnë përsëri Ligjin për Trajtimin e Pronave në Gjykatën Kushtetuese.

Lorenc Rabeta / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.