Pse nuk funksionuan pajisjet elektronike në zgjedhje? – KQZ, tender 4.5 milionë lekë për verifikimin e problematikave

Rreth 4.5 milionë lekë pritet të kushtojë shërbimi për verifikimin e shkaqeve të mosfunksionimit të pajisjeve të identifikimit elektronik në disa qendra votimi në zgjedhjet vendore të 14 majit të këtij viti.

Komisioni Qëndror i Zgjedhjeve ka shpallur thirrjen për tender ku objekti i kontratës është me marrëveshje kuadër, pra me disa operatorë ekonomik ku kërkohen kompani ose ekspertë për të kryer verifikimin e PEI, të cilat janë përdorur për organet e qeverisjes vendore.

Në dokumentet e tenderit theksohet se operatori ekonomik duhet të paraqesë dëshmi për shërbimet e mëparshme të ngjashme me objektin e prokurimit, të kryera gjatë tre viteve të fundit nga data e shpalljes së njoftimit të kontratës, në një vlerë sa 20% e vlerës së fondit limit të kontratës që po prokurohet.

Kohëzgjatja e kontrtës ose marrëveshjes kuadër ka një afat kohor prej 25 ditësh dhe se afati i fundit për paraqitjen dhe hapjan e ofertave në 30 qershor. PEI ose Pajisja e identifikimit elektronik me nënshkrim biometrik është  përdorur për  herë të parë në zgjedhjet e vitit 2021 në Shqipëri në të gjithe vendin, si dhe ne zgjedhjet e pjesshme te vitit 2022.

Aparati biometrik portativ VIU është një lexues gishti që është pajisur me softëare ABIS front-end & backend. Aparati përdor një skaner gishti për një prekje. Ai ka një ekran me cilësi të lartë 10 inç dhe printon fletë konfirmime nga një printer termik i brendshëm. Aparati konfirmon transaksionet, ka ruajtje të të dhënave, përdor kodifikim, certifikata digjitale dhe menaxhon të dhënat përmes nënshkrimeve digjitale.

Diamila Leka/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.