Pse ‘rrëshqitja’ e jenit në 150 për dollar i ka vendosur investitorët në gatishmëri të lartë?!

Rrëshqitja e jenit në 150 për dollar i ka vënë investitorët në gatishmëri të lartë për rrezikun e ndërhyrjes. Por, autoritetet japoneze mund ta kenë të vështirë për të justifikuar mbështetjen e monedhës së tyre.

Në thelb, rrëshqitja prej 3% e jenit në shtator në nivelin më të dobët në 11 muaj, në 149.71 të mërkurën është rezultat i hezitimit të Bankës së Japonisë për të dalë nga një politikë monetare ultra e lehtë, ndërkohë që Rezerva Federale e SHBA mban opsionet e saj të hapura për shtrëngim të mëtejshëm.

Çifti dollar-jen ndjek tradicionalisht hendekun midis yield-eve afatgjata të vendeve, i cili ka arritur në 380 pikë bazë në favor të dollarit. Yield-et e thesarit të SHBA u rritën pasi zyrtarët e Fed surprizuan tregjet javën e kaluar duke lënë të kuptohet për një rritje tjetër të normës këtë vit.

Nga ana japoneze, guvernatori i BOJ-së, Kazuo Ueda, ka shfuqizuar pritshmëritë për një ndryshim të ashpër gjatë muajve të ardhshëm, duke theksuar në mënyrë të përsëritur një qasje të durueshme për të shtrënguar rubinetat në politikën e saj super të lirshme.

Ndërhyrja është me rrezik financiar dhe politik. Për të bërë qoftë edhe një valëzim në tregun e monedhës prej 5 trilion dollarësh, BOJ-së do t’i duhet të tërheqë sasi masive të rezervave të dollarëve.

Duke marrë parasysh përkushtimin e demokracive të pasura kryesore për t’i lënë tregjet të përcaktojnë kursin e këmbimit, Tokio mund të marrë një përgjigje të hidhur nga Uashingtoni kur të përpiqet të shpjegojë pse duhej të derdhte kaq shumë dollarë në tregun e hapur.

Ministri i Financave Shunichi Suzuki tha të premten se ministria nuk ka një “vijë mbrojtjeje”. Por ai ka përsëritur një paralajmërim disa herë këtë muaj se Tokio po e shikon tregun e monedhës “me një ndjenjë urgjence” dhe “nuk do të përjashtojë asnjë opsion” në përgjigjen ndaj “paqëndrueshmërisë së tepruar”.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.