Receta e veçantë gjermane për shpëtimin e ekonomisë – “Anuloni dy festa zyrtare për të “shpëtuar” 30 miliardë euro”

Për shumë punonjës pushimet, janë një mundësi e mirë për të shpëtuar për një moment nga rutina stresuese e përditshme. Ekonomistët gjermanë ndërkohë propozojnë që në të ardhmen të shfuqizohen dy festa. Sepse, sipas tyre, kostot në rritje për klimën dhe mbrojtjen nuk mund të përballohen.

Për të mbyllur “hendekun strukturor prej 15 deri në 30 miliardë euro”, politikanët paraqesin zgjidhje të ndryshme. Disa ekonomistët nga ana e tyre propozojnë heqjen e dy festave publike. Kjo masë synon jo vetëm uljen e deficitit buxhetor, por edhe stimulimin e aktivitetit ekonomik.

Në komentet e tyre për mediat gjermane, ata nuk përmendin ndonjë festë të veçantë publike që mund të shfuqizohet. Megjithatë, sugjerojnë që e hëna e Pashkëve të konsiderohet si një opsion i mundshëm.

Ekonomistët pohojnë se heqja e dy festave publike do të rriste ofertën e punës me gati një për qind. Kjo masë konsiderohet një mjet për rritjen e aktivitetit ekonomik në një kohë të mungesës së fuqisë punëtore të kualifikuar dhe inflacionit. Sipas tyre, heqja e dy festave publike mund të rrisë produktin e brendshëm bruto me 0.5 për qind.

Prandaj, ata u bëjnë thirrje partive në pushtet që jo vetëm të marrin në konsideratë shkurtimin e shpenzimeve dhe rritjen e taksave, por edhe të marrin në konsideratë rritjen reale të orarit të punës, raportojnë mediat gjermane.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.