“Rënia e euros, normale. S’ka pasur spekulime” – Themeli: Mbiçmimi i lekut, rol të rëndësishëm në zbutjen e inflacioni

Edhe në raportin e tretë të Politikave Monetare, të publikuar gjatë paradites të së enjtes, Banka e Shqipërisë nuk sheh asnjë çrregullim dhe spekulim, në nënçmimin e monedhës së përbashkët europiane në tregun vendas.

Në raport theksohet se në tregun valutor shqiptar, presionet mbiçmuese mbi monedhën vendase janë intensifikuar në tremujorin e dytë, në një kohë që kushtet e tregtimit mbeten gjerësisht brenda parametrave normalë. Ky zhvillim reflekton ofertën e shtuar të valutës në treg, të lidhur ngushtë me prurjet e larta të turizmit, të remitancave dhe të investimeve të huaja direkte.

Vlen të theksohet se, pavarësisht rritjes së shpejtësisë së mbiçmimit të lekut, kushtet e tregtimit në tregun valutor mbeten të qëndrueshme, duke mos shfaqur evidencë të ndikimit të faktorëve spekulativë apo të zhvendosjeve të portofolit në ecurinë e kursit të këmbimit, thekson në Raport Banka e Shqipërisë.

Në raport, Banka e Shqipërisë thekson se forcimi i lekut kundrejt euros ka përcaktuar edhe forcimin e tij kundrejt monedhave të tjera.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.