Rënie e normave, çfarë të bëjmë me kursimet? – Yieldi i letrave me vlerë thuajse 3%, ndërkohë që bankat kanë shtuar ofertat drejt 3%

Rritja e fortë e normave të interesave të bonove të thesarit dhe obligacioneve gjatë fundit të vitit të shkuar dhe fillimit të 2023 nxiti shumë individë të tërhiqnin depozitat bankare e t’i investonin kursimet në letra me vlerë. Fenomeni ishtë mëse i justifikuar, në çastin kur sistemi bankar ofronte norma të ulëta interesash për depozitat, edhe ato afatmesmet apo afatgjatat. Volumi më i madh i depozitave të tërhequra nga bankat për t’u investuar në letra me vlerë ndodhi pikërisht në momentin kur bonot e obligacionet arritën kulmin në nëntorin e vitit të shkuar, me instrumentat njëvjeçarë që prekën nivelin e interesit prej 5.8%, ndërkohë që sistemi bankar për këtë maturitet ofronte norma rreth 1%, shumë më të ulëta për ato në euro.

Por çfarë ndodhi më pas? Së pari sistemi bankar nisi t’i reflektonte rritjet e njëpasnjëshme të normës bazë të interesit edhe te depozitat, ndërkohë që së dyti, vëmendja shumë e madhe për të investuar në letra me vlerë rriti dukshëm kërkesën për to, por duke sjellë dhe rënien e interesave të tyre. Në ankandin e fundit, bonot e thesarit me afat maturimi 12-mujor u shitën me normën e interesit 3.09%, vlerë shumë e përafërt me normën bazë të interesit të Bankës së Shqipërisë, por edhe me normat e depozitave të sistemit bankar.

Gjatë muajve të mëparshëm, bankat kanë rritur vazhdimisht normat e interesave të depozitave. Aq sa një prej bankave aktualisht ofron norma interesi prej 3% për depozitat një vjeçare mbi shumën maksimale. Një bankë tjetër ofron norma prej 2% për këtë maturitet, ndërkohë që disa të tjera propozojnë paketa të ndryshme, shumica mbi 1%. Norma mjaft të larta propozohen nga sistemi bankar edhe për depozitat me afat maturimi dy vjeçar, ku gjenden oferta edhe deri 3.5%. Ndërkohë që për depozitat afatgjata, thuasje të gjitha bankat propozojnë interesa mbi 3%.

Norma të tilla interesi me siguri do t’i bëjnë individët të mendohen dy herë përpara se të vendosin të zhvendosin kursimet nga depozitat në drejtim të bonove të thesarit e obligacioneve. Veçanërisht duke parë se rënia e yieldeve të obligacioneve afatgjata, ka qenë muajt e fundit edhe më e fortë se rënia e interesave të bonove 12-mujore.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.